اسلام آباد۔ 19 جون (اے پی پی) وزیر دفاع خواجہ محمد آصف پارینے کہ پیشن نا ملک رہینگوک آ پاکستانیک ملک انا لائف لائن ءُ ولے پاکستان ناجاگہ غا عمران خان نا لائف لائن و ملک ءِ ترسیلات بند کروک آتا مذمت ءِ کینہ، انسانی سمگلنگ اٹ اوار زموار آتا برخلاف سختی اٹ مون تننگے۔ دوشنبے نادے آ قومی اسمبلی نا دیوان اٹی گپ وتران کرسا وزیر دفاع پارے کہ یونان اٹی کشتی نا شکست آ اخس ہم ڈکھیائی و است ہسونی نا درشانی ءِ کننگے کم ءِ، آزاد کشمیر، سیالکوٹ تون اوار کیہی علاقہ غاتا اُراک بھس مسنو، کس اس تینا ڈغار، کس اس تینا زیوار آتے سودا کرسا بردہ فروش آتا دوٹی تس، و اوفتا دوست آک سمندر نا ریسہ غاتا گواچی مسر، پیشن نا ملک روزگار کن گدریفنگ نا عمل 70 نادہائی ٹی بناکرے، اول دادے ریگولرائز کننگا و باقاعدہ لسین تننگا اوکان پد دا اسہ ڈوہ اسے نا دروشم ءِ اختیار کرے۔ اوپارے کہ یونان نا الس نا ضمیر بش مس و او برانز کریر، گچین کاری آن مست داباندات آ حکومت دمدستی نوٹس ہلے ودا دھندا ٹی اوار مخلوق نا برخلاف سخت و دمدستی ایکشن ہلنگے، داڑان بیدس پین ہچ ءُ چارہ اس اف۔ اوپارے کہ بھارت تون اوار کیہی ملک آتا زرگزران خراب ءِ ولے پاکستان اٹ روزگار و تعلیم مفننگ نا سوب آن داحالیت ودی مسنے، دا چناک 35 آن 40 لکھ ترسا ہناسر، حکومت و اپوزیشن تون اوار مچ آ ایوان نا کنڈآن باور کرفنہ کہ مچ آ قوم اوفتا ڈکھیائی ٹی شریک ءِ۔
