اسلام آباد۔ 15 جون (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ سرکاری ملازم آتے 23 جون اسکان دا تُو انا تنخواہ تے تننگ کن پارت جاری کرینے، ایس ڈی جی تیٹی ایم این اے تا شونداری ڈٹ آتا فنڈز نان لیپسس ایبل اکاؤنٹ اٹی شاغنگ کن وزارت کانود و اٹارنی جنرل تون سلابت کینہ۔ پنچ شنبے نادے آ قومی اسمبلی ٹی گپ وتران و باسک آتا کنڈآن چست کروک آ ٹک آتا ورندی ءِ ترسا وزیرخزانہ پارے کہ بجٹ نا بابت ایف بی آر نا واپاری و تکنیکی کمیٹی تا بابت نظرثانی کننگانے ہرانا سرجم آتے او ایوان اٹی جمع کرفینو۔ وزیرخزانہ پارے کہ اوڑتون کیہی وزارت و محکمہ غاک بھلا عئید آن مست سرکاری ملازم آتے تنخواہ تا تننگ کن رابطہ کرینو، وزیرخزانہ پارے کہ اودا بابت سیکرٹری خزانہ ءِ پارت جاری کرینے کہ غٹ سرکاری ملازم آتے 23 جون جمعہ نادے اسکان داتُو انا تنخواہ تے تننگے تانکہ ملازم آک عئید انا بابت تینا گرج آتے پورو کننگ کیر۔
