اسلام آباد۔ 14 جون (اے پی پی) وزیراعظم شہباز شریف کیپٹن کرنل شیرخان شہید(نشانِ حیدر) روڈ(مسکوہی IJPروڈ) نا اول سرآن تفنگ نا ڈٹ انا بناءِ کرے۔ چارشنبے نادے آ بنائی دود اٹی بنجائی وزیرداخلہ رانا ثناء اللہ ، بنجائی وزیر حوالکاری و شینکاری مریم اورنگزیب ، وزیراعظم نا خصوصی کمکار احدچیمہ، قومی اسمبلی نا باسک طاہرہ اورنگزیب ، مسکوہی قومی اسمبلی نا باسک حنیف عباسی، ڈاکٹر طارق فضل چوہدری، ملک ابرار، انجم عقیل خان، ملک شکیل اعوان و مسلم لیگ (ن) نا راہشون تیان بیدس چیئرمین سی ڈی اے نور الامین مینگل و کمشنر راولپنڈی لیاقت چٹھہ و ایلو تعلقدار محکمہ غاتا آفیسر و کارندہ غاک بشخ ہلکر۔ وزیراعظم ءِ دا ڈٹ انا بابت سرجمی اٹ حوال ہم تننگا۔ مسکوہی آئی جے پی روڈ انا پن ءِ بد ل کرسا کیپٹن کرنل شیرخان شہید تخنگانے۔ 9.8کلومیٹر مرغن سڑک فیض آباد آن پیر ودھائی موڑ(پشاور موڑ راولپنڈی) اسکان اول سرآن تفنگانے۔ دا ڈٹ اٹی 2 اوور ہیڈ برج جوڑ کننگانے۔ ڈٹ مسکوہی دورءِ حکومت اٹ سلنگ نا گواچی ئس۔ ساڑی حکومت نا برسراقتدار بننگ آن پد داڑا کاریم ءِ ترندکرسا وزیراعظم محمد شہباز شریف نا خصوصی پارت آ ریکارڈ مد اٹ پورو کننگانے۔ کیپٹن کرنل شیرخان شہید روڈ انا تفنگ آن فیصل آباد آن پیر ودھائی موڑاسکان ٹریفک نا ہن وبر اٹی گچینی بریک و راولپنڈی اسلام آباد نا نیام اٹ گڑاتا ات ودر اٹی آسانی مریک ۔ ہیوی ٹریفک نا سوب آن مہالو دا روڈ گھنٹہ اسکان بلاک مسکہ۔ دا ڈٹ انا پوروی آن الس نا متکن آ ویل ایسر مس۔
