اسلام آباد۔ 14 جون (اے پی پی) وزیراعظم محمد شہباز شریف الیونتھ ایونیو ڈٹ انا بنداو ءِ تخا۔ 7.2 کلومیٹر نا دا ڈٹ اِرا ریسہ غاتیٹی 16 ارب روپئی نا خڑچ آن پورومریک۔ چارشنبے نادے آ وزیراعظم بنجائی وزیر راناثناء اللہ، مریم اورنگزیب تون اوار الیونتھ ایونیو ڈٹ انا بنداو ءِ تخا۔ داوخت آ مسکوہی قومی اسمبلی نا باسک حنیف عباسی، ملک ابرار، انجم عقیل خان، ڈاکٹر طارق فضل چوہدری ئسک ہم داوخت آ ساڑی ئسر۔ وزیراعظم ءِ الیونتھ ایونیو ڈٹ آ حوال تننگا۔ اودے پاننگاکہ دا ڈٹ انا اولیکو ریسہ ٹی 4.20کلومیٹر شاہراہ تفنگک، داٹی اِرا انٹرچینج و اِرا فلائی اوور اوار ءُ۔ مسہ رویہ شاہراہ غا 9 ارب روپئی خڑچ بریک۔ اولیکو ریسہ اسہ سال اٹی پورو مریک۔ ارٹ میکو ریسہ ٹی مسہ کلومیٹر مرغن شاہراہ تفنگک ہراٹی اِرا انڈر پاس و اِرا انٹرچینج اوار ءُ۔ ارٹ میکو ریسہ نا پوروی آ ہم اسہ سال اس لگک۔ دُن تو دا ڈٹ اِرا سال اٹی پورومریک۔ ارٹ میکو ریسہ غا 7 ارب روپئی خڑچ بریک۔ دا ڈٹ اٹی ریلوائی ٹریفک جنکشن و آئی جے پی روڈ آ انٹرچینج و فلائی اوور تفنگک۔ الیونتھ ایونیو آ خیابان اقبال، ابن سینا، سری نگر ہائی وے آ انٹرچینج و فلائی اوور تفنگک ۔
