لاہور۔ 14 جون (اے پی پی) بنجائی وزیرحوالکاری و شینکاری مریم اورنگزیب پارینے کہ فنکار آک ننا درستی راستی و قومی میرات ءُ، ملکی دودوربیدگ نا مون آ دننگ و قومی تشخص ءِ شون تننگ اٹ فنکار آتا اہم ءُ کڑد اسے۔ داہیت ءِ او اوڑدہی کن بروک فلم، اسٹیج و ٹی وی آرٹسٹ آتون گپ وتران کرسا پارے۔ فنکارآک بروک آ مالی سال انا بجٹ اٹ فلم فنانس فنڈ و ہیلتھ انشورنس کن بھلو زراسے نا جتا کننگ آ بنجائی وزیرحوالکاری نا منت واری ءِ ہرفیر۔ اووزیراعظم شہباز شریف و بنجائی وزیر حوالکاری نا کوشست آتیا اوفتے زبردست خراج تحسین پیش کریر۔ داوخت آ گپ وتران کرسا بنجائی وزیر حوالکاری پارے کہ تخلیقی سوچ انا است بڈی راج انا نموکن المی ءِ۔ اوپارے کہ بروک آمالی سال انا بجٹ اٹی فلم فنانس فنڈ اکن اِرا ارب و فنکار آتا ہیلتھ انشورنس کن اسہ ارب روپئی جتا کننگانے۔ بنجائی وزیر پارے کہ فلمی صنعت نا شونداری و بحالی حکومت نا اولیت ءِ۔ اوپارےکہ مچ آ دنیا ٹی پاکستان نا مثبت تشخص و روشنا شناخت ءِ مون آ دننگ وخت انا اہم ءُ گرج اسے۔ بنجائی وزیر حوالکاری فنکارآتا ویل آتے ایسر کننگ و مسکوہی دور اٹی فنکار آتا حق تلفی تا ازالہ نا باوری ءِ کرفے۔ فنکار آک بنجائی وزیر حوالکاری مریم اورنگزیب ءِ پھل آتا گلدستہ اس ہم پیش کریر۔
