اسلام آباد۔ 14 جون (اے پی پی) سندھ آن قومی اسمبلی نا باسک غوث بخش مہر پارینے کہ ساڑی حکومت آئین وکانود نا رداٹ برسر اقتدار بسنے، مستین نا حکومت آ ہروخت تنقید کننگ نا جاگہ غا ہروڑنا سیاست آن ایڑترمرسا قوم انا خذمت ءِ کننگے، سی پیک نا برخلاف جہانی کہول آ سازش مننگ ءِ اودےزوت آن زوت پورو کننگے، وزیراعظم بجٹ اٹ شمسی توانائی کن زر جتا کرسا اسہ جوان ءُ کاریم اس کرینے۔ چارشنبے نادے آقومی اسمبلی ٹی بروک آ مالی سال 2023-24نا بجٹ آ شرہ ٹی بشخ ہلسا غوث بخش مہر پارے کہ بجٹ کن دا خصوصی دیوان ءِ بٹنگ تنے، مہالو آن برجا دیوان اٹی بجٹ ءِ پیش کننگا و ننے پت اٹ ہلنگتو۔ اوپارے کہ ہردور اٹی دا کوشست مرسا کرینے کہ بجٹ نا کمک اٹ حالیت آتے گچین کننگے، تدوک آسال ہررداٹ خراب گدرینگا کہ سندھ انا نوکاپ آن زہمی داسکان مشکل آتا گواچی ءُ، ولدا دیر بننگ ءِ، ولے بیراج آتیا جوڑ جاڑ نا کاریم داسکان بناکننگ تنے۔ اوپارےے کہ پاکستان اسہ کشاری ءُ ملک اسے، بج و کھد آ تیٹی کشارگرآتے ہچ ءُ ریلیف اس تننگ تنے، چیئرمین پی ٹی آئی تون انتس کروئی ءِ ضرور کیر ولے الس ءِ ریلیف ایتر۔ اوپارے کہ سیاست آن ایڑتر مرسا قوم انا خذمت ءِ کننگے، حکومت ءِ مرے کہ گچین کاری کرفے و ہروخت نا تنقید آن تینا جون ءِ کشے۔ اوپارے کہ سی پیک نا برخلاف جہانی کہول آ سازش مننگ ءِ اودے زوت آن زوت پورو کننگے۔
