اسلام آباد۔ 14 جون (اے پی پی) بنجائی وزیر قومی غذائی رکھ و پٹ وپول طارق بشیر چیمہ پارینے کہ حکومت نا کنڈآن تاریخ اٹ اولیکو وار کشاری بشخ اکن شمسی توانائی نا بابت بجٹ اٹ زر جتاکننگانے، سندھ انا کشاری ویل آتا بابت صوبائی حکومت نا کمکاری اٹ ھکومت تینا کڑد ءِ ادا کیک و کشاری بشخ ءِ گوجالنگ پننگک۔ چارشنبے نادے آ قومی اسمبلی ٹی بنجائی وزیر قومی غذائی رکھ و پٹ وپول طارق بشیر چیمہ قومی اسمبلی نا باسک غوث بخش مہر نا کنڈآن چست کروک اعتراض آتا ورندی ءِ ترسا پارے کہ نیت آتا حال ءِ اللہ چاہک، خولم نا بمبر کراپ نا سوب آن واٹر لاگنگ مرے یا انتس کہ دا اللہ نا مہروانیءِ، پاکستان تدوک آ سال ہم برنج دوئی کرے، داسال ہم برنج برآمد کروئی آ ملک ءِ۔ اوپارے کہ دااولیکو بجٹ ءِ ہراٹی کشت وکشار تو ن وابستہ مخلوق کن شمسی توانائی نا زر جتا کننگانے، ای فاضل باسک ءِ باوری کرفیوہ کہ داسکان کس اسے ہم دا فنڈ جاری کننگتنے، سندھ انا کشاری ویل آتا بابت صوبائی حکومت نا کمک اٹ حکومت تینا پبی کڑد ءِ ادا کیک۔ اوباوری کرفے کہ کشاری بشخ ءِ ہچ ءُ وڑاسے ٹی گوجالنگ پننگک۔
