اسلام آباد۔ 13 جون (اے پی پی) وزیراعظم محمد شہباز شریف پارینے کہ بروک آ مالی سال انا بجٹ صنعت ، کشت وکشار ، آئی ٹی ، توانائی نا بشخ آتیٹی ترندی اٹ شونداری و زرگزرانی سوگوی نا بجٹ ءِ، ورناک ملک انا آخبت آک ءُ، و ورناتا آخبت ءِ جوڑ کننگ ہروارآنبار کنا اولیت ءِ۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف اسہ بیان اسے ٹی پارے کہ بجٹ 2023-24ورناتا شونداری کاروبار و روزگار نا تاریخی بجٹ ءِ، مایوسی تے چٹفنگ، ملک و قوم انا شونداری و شونہالی آن پوسکن آ پت و اومیت بحال ءِ کروئی مریک، بروک ا ٓمالی سال پاکستان و الس نا کٹیا ءِ ودفنگ نا سال جوڑ مریک۔ شہباز شریف پارے کہ بروک آ مالی سال انا بجٹ صنعت، کشت وکشار، آئی ٹی ، توانائی نا بشخ آتیٹی ترندی اٹ شونداری و زرگزرانی سوگوی نا بجٹ ءِ، ورناتے رزگار خواہنگ نا جاگہ غا روزگار تروک آکاروباری جوڑ کننگ نا وارخواہی اوار ءِ۔ ورناک ملک انا آخبت ءُ وورناتا آخبت ءِ جوڑ کننگ ہروارآنبار کنا اولیت ءِ، آئی ٹی، کشت وکشار، صنعت اٹی کاروبار نا بناآن ورناتے پاکستان ناشونداری نا جوڑ کروک کروئی ءِ۔ وزیراعظم پارے کہ ورناتے اسہ لکھ لیپ ٹاپ، چنکو ورعایتی وام تننگ اُن، ورناتا است بڈی ءِ کننگ کن بجٹ اٹ آئی ٹی کاروبار اٹی خراج ءِ اِلانن، 2 ہزار ارب روپئی آن زیات بزغر پیکج آن کشت وکشار و بزغر آتا گچینی نا سفر پین ترند مریک۔ اوپارے کہ بجٹ 2023-24نا کمک اٹ کشاری بشخ اکن آسودہی تے برجاتخنہ۔ داگام گیج آتیان غذائی رکھ دوئی مریک، ورناتے کشاری شونداری ٹی حصہ دار جوڑ کننگ اُن۔ کشاری و کاروباری وام تیان بزغر، ورنا و پاکستان شونہال مریرہ۔
