اسلام آباد۔ 13 جون (اے پی پی) صدر مملکت ڈاکٹر عارف علوی شہید آتا وطن کن خذمت و فرض اتون حد درجہ لگن نا ستاءِ کرسا اوفتا نرزوری و جوزہ حب الوطنی نا ستاءِ کرینے۔ ایوان صدر نا پریس ونگ آن سے شنبے نادے آ جاری بیان نا رداٹ صدر مملکت داخیال آتا درشانی ءِ چندی واقعہ غاتیٹی شہید مروک آ پاک فوج انا شہید آتا خاہوت آتون ٹیل فون آ گپ وتران کرسا کرے۔ اووطن کن جون تے ندر کننگ آ شہید و اوفتا خاہوت آتے خراج عقیدت پیش کرے۔ صدر مملکت یکم جون آ سنگوان بلوچستان اٹی شہید مروک آ سپاہی عنایت اللہ و حسنین اشتیاق نا وارث آتون فون آ ہیت کرے۔ صدر مملکت شہید آتا جوزہ حب الوطنی نا ستاءِ کرے و خاہوت آتون ہمدردی نا درشانی ءِ کرے۔ ڈاکٹر عارف علوی 3 جون آ قطبی وزیرستان اٹی شہید مروک آلانس نائیک معراج الدین نا باوہ تون ہم ہیت کرے۔ صدر مملکت 4 جون آ میر علی ٹی شہید مروک آ نائیک ظہیر عباس نا باوہ تون ہم ہڑزخواہی کرے۔ او4 جون آ جانی خیل اٹی شہید مروک آ حوالدار محمد انور و نائب صوبیدار غلام مرتضیٰ نا وارث آتون ہم فون آ ہڑزخواہی کرے۔ صدر مملکت 5 جون آ سویلی وزیرستان اٹی شہید مروک آلانس نائیک صابر نا خاہوت تون ہم رابطہ کرے۔ صدر مملکت غٹ شہید آتا وطن کن خذمت و فرض اتون حددرجہ لگن نا ستا ءِ کرے و شہید آتا نرزوری و جوزہ حب الوطنی نا ہم ستاءِ کرے۔ اوشہید آتا درجہ غاتا بڑزی و خاہوت نا صبر وجمیل کن ہم دعاکرے۔
