اسلام آباد۔ 12 جون (اے پی پی) صدر مملکت ڈاکٹر عارف علوی ملک اٹی چناتا حق انا رکھ و چائلڈ لیبر نا چٹفنگ کن کوشست آتے ترند کننگ نا گرج آ زور شاغسا پارینے کہ راجی انصاف نا مون آ دننگ و چناتے تعلیم نا فراوانی ءِ پک کرسا چائلڈ لیبر ءِ چٹفنگ مریک۔ ایوان صدر نا پریس ونگ آن دوشنبے نادے آ جاری بیان نا رداٹ صدر مملکت دا خیال آتا درشانی ءِ چناتا مشقت (چائلڈ لیبر) نا جہانی دے انا وخت آ تینا کلہو اٹی کرے۔ اوپارے کہ دا دے چائلڈ لیبر نا چٹفنگ و دا بارواٹی آگاہی ودی کننگ کن اڈتننگ انگ ءِ، چناتا مشقت جہانی کہول آ مون تروک اسہ بھلو چیلنج اسے، اقوام متحدہ نا رداٹ دنیا ٹی کم و وود 16 کروڑ چنا مشقت آ بیوس و ہر 10 آن اسہ چناس مزوری کننگ ءِ۔ اونا پاننگ ئس کہ دُن تو جہانی کہول آ چائلڈ لیبر اٹی کمتی بس ولے داسکان پین کاریم کننگ نا گرج ءِ، راجی انصاف نا مون آ دننگ آن چناتا مشقت نا چیلنج نا مون ءِ توننگ مریک۔ اوپارے کہ چائلڈ لیبر نا چٹفنگ کن اونا بنداو سوب آتا مون ءِ توروئی مریک ، نیزگاری، جنگ، دہشت گردی و تعلیم اسکان رسینگ مفننگ ہم چائلڈ لیبر نا بھلاسوب آک ءُ۔
