بنوں۔ 12 جون (اے پی پی) ڈپٹی اسپیکر قومی اسمبلی زاہد اکرم درانی ڈپٹی کمشنر آفس لکی مروت نا دورہ ءِ کرے، داوخت آ لکی مروت نا علاقائی مشیران و سرکڑدہ غاک ہم ڈپٹی کمشنر آفس اٹی ساڑی ئسر۔ ڈپٹی کمشنر لکی مروت زاہد اکرم درانی ءِ لکی مروت اٹی طوفانی پِر انا سوب آن مروک آ جونی و مالی نسخان تیا حوال تس۔ ڈپٹی اسپیکر قومی اسمبلی لکی مروت اٹی طوفانی پِر آن مروک آ جونی و مالی نسخان تیا است ہسونی نا درشانی ءِ کرے۔ اوزوال کروک آ بندغ آتا خاہوت تون ہڑزخواہی و ہمدردی نا درشانی ءِ کرے۔ اوپارے کہ زوال کروک آ بندغ آتا اناگت تینا خاہوت آتیان ہِننگ پدسلوک آتیکن اسہ بھلو صدمہ و بےبدل ءُ نسخان اسے ہرادے اسُل پورو کننگ مفک۔ اوپارے کہ ای ڈکھیائی و است ہسونی نا دا مشکل ساہت اٹی زوال کروک آتا وارث آتا غم اٹی بریبر نا شریک اُٹ۔ اوپارے کہ قیمتی جون تا زیان نا ڈکھیاتا مداوا ءِ کننگ مشکل ءِ۔ ڈپٹی اسپیکر زوال کروک آ بندغ آتا روح انا ثواب کن دعاپاتیا کرے۔ اواللہ تعالیٰ آن زوال کروک آتا درجہ غاتا بڑزی، ٹھپی تا زوت دراخ جوڑی و خاہوت ءِ دابے بدل نسخان ءِ سگنگ کن صبر وجمیل عطا کننگ نا دعاکرے۔ داوخت آ ڈپٹی اسپیکر زاہد اکرم درانی لکی مروت اٹی زوال کروک آ بندغ آتا خاہوت ءِ 10 لکھ روپئی نا چیک بشخا۔ داکان مست ڈپٹی اسپیکر بنوں ٹی طوفانی پِرآن زوال کروک آ بندغ آتا وارث آتے دہ دہ لکھ، ٹھپی تے مسہ مسہ لکھ وخت اس کہ زرس ٹھپی تے 50 ہزار روپئی نا چیک تس۔
