اسلام آباد۔ 12 جون (اے پی پی) اسپیکر قومی اسمبلی راجہ پرویز اشرف پارینے کہ چناک ہرقوم انا آخبت مریک، ہرافتے شون تننگ کن گچین تعلیم و تربیت تون اوار اوار اوفتے ہروڑنا جبری مشقت و ذہنی و جونی استحصال آن بچفنگ کن خصوصی گام گیج کننگ نا گرج ءِ۔ اوداخیال آتا درشانی ءِ جہانی چائلڈ لیبر ڈے انا وخت آ تینا کلہو اٹی کرے ہر اہرسال 12 جون آ اقوام متحدہ نا بست وبنداٹی مچ آ دنیا ٹی اڈتننگک۔ راجہ پرویز اشرف پارے کہ چناتیان جبری مشقت ہلنگ اوفتیان اوفتا چنکی ءِ پلنگ آنبار ءِ، مشقت ہلنگ آن او تعلیم نا دوئی کننگ و گوازی تیٹی بشخ ہلنگ(ہرااوفتا نشوونما کن المی ءِ) آن محروم سلرہ۔ اسپیکر پارے کہ آئین پاکستان چناتا حق انا پورو ضمانت ایتک، آئین نا رداٹ 5 آن 16 سال اسکان چناتے تعلیم دوئی کننگ کن آسراتی تا فراوانی حکومت نا زمواری ءِ۔ اوپارے کہ پاکستان چناتے مشقت آن بچفنگ نا جہانی کنونشن نا سگنیٹری ءِ و دابابت جہانی معاہدہ غاتیا سختی اٹ عمل کننگ ءِِ۔ اونا پاننگ ئس کہ پاکستانی کانود نا رداٹ چناتیان جبری مشقت ہلنگ اسہ سزا نا قابل ءُ ڈوہ اسے۔ اسپیکر قومی اسمبلی پارے کہ قومی اسمبلی نا کنڈآن پاکستانی پارلیمان ملک انا 75 سال پورو مننگ آ ڈائمنڈ جوبلی دود آتے اڈ تس و داوخت آ اسہ خصوصی کنونشن اس اڈتننگاسس ہراٹی راج انا غٹ تپہ غاتیان تعلق تخوک آ بندغ آتے بشخ ہلنگ نا موقع فراوان کننگا۔ اوپارے کہ دا اہم کنونشن اٹی مچ آ ملک آن چناتے قومی اسمبلی نا ایوان اٹ بٹنگ انگا ہراڑے او تینا لائخی تا درشانی ءِ کریر و ملک اٹی چناتے مون تروک ویل آتے پبی وڑاٹ تالان کریر ہرافتے مچ آ ملک اتو ن اوار جہانی کہول آ بھلو کچ اسے آ پذیرائی دوئی مس۔ اسپیکر پارے ک قومی اسمبلی ٹی چناتا راجی آسراتی کن کانود سازی اس جوڑ کننگ و چناتا بابت ساڑی کانود نا جاچ ءِ ہلنگ، اوفتے پین گچین کننگ کن اسہ خصوصی چائلڈ رائٹس کاکس اس جوڑ کننگا۔ اوچناتے جبری مشقت آن بچفنگ نا بابت کانود آ عملدرآمد ءِ پک کننگ، اوفتا تعلیم و تربیت کن سازگار چاگڑد اس فراوان کننگ و اوفتے جبری مشقت آن بچفنگ ن راج انا غٹ تپہ غاتے چائلڈ لیبر نا چٹفنگ کن اواری اٹ کاریم کننگ نا گرج آز ور شاغا۔
