اسلام آباد۔ 09 جون (اے پی پی) بنجائی وزیر حوالکاری و شینکاری مریم اورنگزیب پارینے کہ فائیو۔ ای فریم ورک پاکستان اٹ زرگزرانی شونداری نا گیم چینجر مریک، ایکسپورٹس، ای پاکستان، واٹر اینڈ فوڈ سیکورٹی، انوائرمنٹ ، انرجی و ایکویٹی ٹرن اراؤنڈ پاکستان نا تمبہ غاک ءُ، دا فریم ورک انا کمک اٹ برآمد آتیٹی ودکی کن پوسکن آ کاروبار و روزگار نا است بڈی مریک ، تعلیم، جان جوڑی نا مون آ دننگ و آبادی آ کنٹرول آن پاکستان نا شونداری نا کسر آوار مریک۔ جمعہ نادے آ تینا ٹویٹ اٹی اوپارے کہ اڑزان و بے سلنگ آن توانائی نا فراوانی آن زرگزران و کاروبار اٹی پوسکن ءُ ترندی اس بریک، آبی کوڑی و غذائی رکھ انا کمک اٹ چاگڑد ءِ گچین کننگک۔ اوپارے کہ ای پاکستان نا کمک اٹ ورناتے شونداری نا وارخواہی ایتنہ، اوفتے واکدار کننگک، اوپارے کہ جی ڈی پی نا لحاظ اٹ فسکل نسخان نا 4.9 درسد آن کم مرسا 4.6 درسد آ بننگ بھلو سرسہبی اسے، دا حکومت نا سہی زرگزرانی پالیسی نا مثبت بھرم ءِ۔ اوپارے کہ کرنٹ اکاؤنٹ نسخان اٹی 76 درسد کمتی سہی زرگزرانی پالیسی تا نشانی ءِ، واپاری نسخان اٹی 40.4 درسد کمتی زرگزرانی گام گیج نا سہی مننگ ءِ ظاہر کیک۔ بنجائی وزیر حوالکاری پارے کہ واپاری نسخان 43.4 ارب ڈالر آن کم مرسا 25.8 ارب ڈالر مسنے ہرا گچینی نا کنڈا بناءِ۔ اوپارے کہ درآمد آتیٹی 29.2 درسد کمتی مس ہرانا زرگزرانی حالیت آتیا اثر مرتب مس، 72.3ارب ڈالر نا مقابلہ ٹی درآمد آتا 51.2 ارب ڈالر آ بننگ زرگزرانی گچینی نا کنڈاگام اسے۔ اوپارے کہ تدوک آ مالی سال انا 5 ہزار 348.2 ارب روپئی نا مقابلہ ٹی 6210ارب روپئی خراج ریونیو جمع مس۔ برجامالی سال انا اولیکو 9 تُو اٹی 7 لکھ ایف بی آر خراج تروک آتا ہدف نا مقابلہ ٹی کم و ود 9 لکھ 12 ہزار پوسکن آ خراج تروک آتے رجسٹرڈ کرینے۔
