اسلام آباد۔ 08 جون (اے پی پی) پاکستان و ترکمانستان تاپی گیس پائپ لائن اسیجائی عملدرآمد ڈٹ انا معاہدہ غا دستخط کرینووخت اس کہ وزیراعظم محمد شہباز شریف پارے کہ تاپی ڈیہہ نا شونہالی کن اہم ءُ ڈٹ اسے، ڈٹ آن ڈیہہ ءِ قدرتی گیس انا فراوانی ممکن مریک ، جہانی حالیت آتا رداٹ توانائی نا فراوانی اسہ بھلو چیلنج اسے، داڈٹ آن علاقائی کمکاری و شونہالی نا اسہ پوسکن ءُ دور اس بناکیک۔ داخیال آتا درشانی ءِ او پنچ شنبے نادے آ تاپی گیس پائپ لائن اسیجائی عملدرآمد ڈٹ انا معاہدہ غا دستخط نا دود آن تران کرسا کرے۔ دستخط آتا دود پنچ شنبے نادے آ داڑے اڈ ہلک۔ دود اٹی وزیراعظم محمد شہباز شریف ئسک ہم ساڑی ئسر۔ پاکستان نا کنڈآن وزیر مملکت پیٹرولیم ڈاکٹر مصدق ملک و ترکمانستان نا وزیر مملکت و ترکمن گیس انا چیئرمین مکسات بابائیف دستخط کریر۔ داوخت آ تران کرسا وزیراعظم پارے کہ اینو اسہ بھلو دے اسے، پاکستان و ترکمانستان تاپی گیس عملدرآمد ڈٹ آ دستخط کرینو۔ داڑکن ترکمانستان نا صدر و اونا ٹیم انا منت واراُن۔ تاپی دا مچ آ ڈیہہ انا شونہالی کن بھاز اہم ءُ ڈٹ اسے۔ دا ڈٹ اشک آباد آن بناکیک و اوغانستان و پاکستان آن بھارت اسکان پورو کننگک۔ داڑان دا ڈیہہ ءِ ڈٹ آ پبی باوری و تین پہ تینی وڑاٹ طے مروک شڑت آتا رداٹ قدرتی گیس انا دوئی کننگ اٹ کمک رسینگک۔ جہانی حالیت آتارداٹ اینو توانائی اسہ حقی ءُ چیلنج اس جوڑ مسنے و پاکستان کون آ پدتموک ملک آتے داچیلنج تون مون تننگ کن جوان پالیسی و دمدستی گام گیج آتا گرج ءِ۔ تاپی آن علاقائی کمکاری و شونہالی نا پوسکن آ دور بناکیک۔ تینا ٹیم ءِ پارت کیوہ کہ داڈٹ انا ڈٹ بندی آ عملدرآمد نا عمل ءِ ترند کننگے۔ اوپارے کہ ترکمانستان نا ڈل انا پاکستان نا دورہ غا منتوار ی ءِ ہرفنہ کہ داڑان ننے دا موقع ملانے کہ دنیا ءِ دا باور کرفن کہ تینا ہڑتوم آ کنڈآتا تعلقداری و اقتصادی کمکاری نا مون آ دننگ کن سنبرینگوک اُن۔ دا اہم موقع غا پاکستان و ترکمانستان نا وزارت پیٹرولیم ءِ مبارکبادی ایتیوہ، ترکمانستان پاکستان سنگتی زندہ باد۔
