اسلام آباد۔ 08 جون (اے پی پی) وزیراعظم شہبازشریف ورنا، زالبول و بزغرآتا شونداری ناانقلابی پروگرام بجٹ اٹ اوار کننگ نا منظوری ءِ تس۔ وزیراعظم آفس نا میڈیا ونگ انا کنڈآن جاری بیان نا رداٹ بجٹ 2023-24اٹی ورنا، زالبول و کشاری ٹیوب ویل آتا بابت خصوصی ڈٹ آتیکن زر جتا کننگک، ورناتے بے سود وام ملک، تعلیم و اسپورٹس انڈومنٹ فنڈ جوڑ کننگک۔ پنجاب انڈوومنٹ فنڈ انا طرز آ ’’پاکستان انڈومنٹ فنڈ تعلیم‘‘ جوڑ کننگ نا ہم منظوریءِ تننگانے، دا فنڈ آن مچ آملک انا ذہین ولے نیزگار طالب علم آتے وظیفہ تننگک۔ ورناتے چنکووام تننگ نا وزیراعظم یوتھ پروگرام کن بھلو زر اس جتا کننگانے۔ ورناتے آئی ٹی تون اوار چندی کسب ہیل تننگ کن وسیلہ بجٹ اٹ تخنگانے۔ ورناتے اسہ لکھ مفت لیپ ٹاپ نا فراوانی کن زرہم بجٹ اٹ جتا کننگانے۔ آئی ٹی نا بشخ اٹی پوسکن آ کاروبار اس بناکروک آ اورناتا مالی کمک ءِ کننگک۔ ورناتے گوازی نا پڑاٹ اتنگ و اسپورٹس سرجزآتا است بڈی کن فنڈ جتا کننگا۔ زالبول آتے مالی وڑاٹ واکدار کننگ نا پروگرام کن زرتخنگانے۔ کشاری ٹیوب ویل آتا شمسی توانائی آ گدریفنگ پروگرام نا ہم منظوری ءِ تننگانے، کشاری ٹیوب ویل آتا شمسی توانائی آ گدریفنگ وزیراعظم نا بزغر پیکج نا ارٹ میکو بشخ انا وڑاٹ کننگک۔
