اسلام آباد۔ 08 جون (اے پی پی) بنجائی حکومت پوسکن آ مالی سال 2023-24نا کم وود 14 ٹریلین روپئی مالیت نا بنجائی بجٹ ءِ پگہ ( جمعہ نادے آ) پیش کیک، بنجائی وزیر خزانہ و محصولات سینیٹر محمد اسحاق ڈار قومی اسمبلی ٹی بجٹ ءِ پیش کیک۔ حکومت ملکی و جہانی کہول آ زرگزران ءِ مون تروک ویل و چیلنج آتے مون آ تخسا بجٹ اس جوڑ کرینے۔ پوسکن آ مالی سال انا بنجائی بجٹ اٹی الس ءِ زیات آن زیات ریلیف فراوان کننگ، کشاری بشخ انا شونداری و کشاری صنعت اٹ اختراع، انفارمیشن ٹیکنالوجی نا مون آدننگ، برآمد آتیٹی ودکی، صنعتی شونداری ءِ مون آ دننگ، کاروبار و زرکاری ٹی آسانی فراوان کننگ و زرگزران ءِ دستاویزی جوڑ کننگ آ چکار کننگانے۔ حکومت الس و کاروبار دوست بنجائی بجٹ پیش کننگ کن پورو وڑاٹ سنبرینگوک ءِ۔ پوسکن آ مالی سال انا بنجائی بجٹ اٹی نسخان نا مون ءِ توننگ کن مالیاتی سوگوی نا پالیسی تیا ہم چکار کننگانے۔ پیشن نا مالیاتی ادائیگی تا بست وبند آن بیدس محصولات آتیٹی ودکی، اقتصادی سوگوی و شونداری کن گام گیج ، غیر شونداری خڑچ آتیٹی کمتی ، روزگار ناوارخواہی ودی کننگ تون برآمد آتیٹی ودکی و ملک انا راجی و اقتصادی شونہالی کن الس دوست پالیسی بجٹ اٹ اوار کننگک۔ پوسکن آ مالی سال انا بنجائی بجٹ اٹ گورننس اٹی گچینی و زرکاری کن نجی بشخ ءِ مون آ دننگ کن اصلاحات درستی راستی کرفنگ آن بیدس راجی بشخ انا شونداری آ ہم چکار کننگ انگ ءِ۔حکومت خراج وصولی نا نظام اٹ گچینی اتنگ، خراج نا بنداو ءِ ودفنگ و خراج تروک آتے آسراتی فراوان کنگ کن گام گیج کیک۔ برجامالی سال اٹی محصولا آتا سوگو نمو ءِ مون آتخسا حکومت نا کنڈآن مالی سال 2023-24کن محصولات نا وصولی نا ہدف 9 ٹریلین روپئی آن زیات مقرر کننگ نا گمان ءِ۔ ذرائع نا رداٹ پوسکن آ مالی سال 2023-24نا بنجائی بجٹ کن غٹ تیاریک ترندی اٹ برجاءُ۔
