اسلام آباد۔ 08 جون (اے پی پی) پاکستان پارینے کہ او اقوام متحدہ نا سلامتی کونسل ناقرارداد نا رداٹ جموں وکشمیر نا جھیڑہ نا انصاف و پرامن ایسری کن کشمیری تا سیاسی ، سفارتی و اخلاقی مخ تفی ءِ برجاتخک۔ ترجمان دفترخارجیہ ممتاز زہرا بلوچ پنچ شنبے نادے آداڑے پریس حوال اٹی پارے کہ 4 جو ن آ جارحیت نا شکار کودک چناتا جہانی دے ءِ اڈتننگا۔ اوپارے کہ دادے ننے کشمیری چناتا حالیت زار نا یات ترفک ہرا بھارتی فوج انا پدریسہ گھیڑ و وحشیانہ جور انا سوب آن پدریسہ مشکل آتا گواچی ءُ۔ ترجمان پارے کہ کشمیری چناتا اسہ مچ ءُ چین اس خوف، بیدادی و جور انا چاگڑد اٹی ءِ، کشمیری چوری چناک زرگزرانی مشکل، تنیائی و نفسیاتی صدمہ نا ہم گواچی ءُ۔ اوپارے کہ بھارتی فورس آتا کنڈآن پیلت، سم و آنسو گیس انا گولہ غاتیان اسہ بھلو کچ اسے ٹی طالب علم چناک ٹھپی مسر ، اوفتیان بھاز انگاک تینا خن تا بینائی، پورو یا جزوی وڑاٹ گوہانو۔ اوپارے کہ اقوام متحدہ بھارت آ زور شاغانے کہ او چناتا رکھ اکن احتیاطی تدابیر اختیار کے ہرافتے ٹی چناتا برخلاف چھرہ غاتا کاریم اٹ اتنگ ءِ بند کننگ ہم اوار ءِ۔ ترجمان پارے کہ نن بھارت آ زور شاغنہ کہ او دا خواست آ عمل کے و کشمیر نا چناتے تشدد، بے اُرا مننگ و صدمہ غان بچفے۔ ترجمان دا عزم انا پبی درشانی ءِ کرے کہ پاکستان اقوام متحدہ نا سلامتی کونسل ناقرارداد آتا رداٹ جموں و کشمیر جھیڑہ نا انصاف و پرامن ایسری کن تینا کشمیری ایڑھ و ایلم تا سیاسی سفارتی و اخلاقی مخ تفی ءِ برجاتخک۔
