کوئٹہ۔ 08 جون (اے پی پی) وزیراعلیٰ بلوچستان میر عبدالقدوس بزنجو پارینے کہ بلوچستان اٹی ہروڑنا ملکی و درملکی بندغ ءِ چنڑز اتون اوار چک آتا شکار کننگ نا موکل تفننگک، یو این چارٹرو بلوچستان وائلڈ لائف پروٹیکشن ایکٹ آ عملدرآمد ءِ پک کینہ۔ داڑے جاری مروک اسہ بیان اسے ٹی وزیراعلیٰ بلوچستان نا سرزمین ءِ تلور آئبیکس و ایلو نایاب چک و ساہدار تا شکار کن ممنوع گوندساغٹ ڈپٹی کمشنر و محکمہ جنگلات و جنگلی حیات نا آفیسر و کارندہ غاتیا جنگلی حیات نا رکھ ءِ پک کننگ نا پارت کرینے و پارینے کہ ہرا علاقہ ٹی چک و ساہدار تا شکار نا حوال ملا ہمو ضلع نا ڈی سی و تعلقدار عملہ نا برخلاف کارروائی مریک۔ وزیراعلیٰ پارے کہ جنگلی حیات نا رکھ قومی زمواری الس ہم جنگی حیات نا رکھ اٹ تینا زمواری تے ادا کے۔ وزیراعلیٰ پارے کہ کاروبار نا غرض اٹ نایاب چک آتا ہلنگ واوفتے دوکان و اُراتیٹی تخوک آتا برخلاف ہم کریک ڈاؤن کننگے بلوچستان ءِ جنگی حیات کن رکھ ءُ ڈیہہ اس جوڑ کینہ۔ اوپارے کہ بلوچستان حکومت نا چک آتا شکار علاقہ غاتا غٹ الاٹمنٹ آتے منسوخ کننگ نا فیصلہ کرینے 18 می ترمیم نا رداٹ علاقہ غاتا الاٹمنٹ و منسوخی صوبائی حکومت نا اختیار ءِ ، اوپارے کہ تینا دا حق و اختیار نا پبی دفاع ءِ کینہ، حکومت ءِ تینا دا اختیار نا کاریم اٹ اتنگ نا آئینی و کانودی رکھ دوئی ءِ۔ اوپارے کہ حکومتی فیصلہ ءِ کانودی فورم آتیا چیلنج کننگ مفک، ٹرافی ہنٹنگ آ ہم پابندی مریک کودک چک وساہدار تا جون نا قیمت آ پیسہ و تعلقداری قائم کننگ نا گرج اف، اگہ کس اسے حکومت نا فیصلہ غا ابہام ارے تو او محکمہ جنگلات و جنگی حیات تون رابطہ کے۔
