زوت ملک انا زرگزرانی حالیت گچین مریک، وزیراعظم نا پی اے ایف اکیڈمی رسالپور اٹی پاسنگ آئوٹ پریڈ نا دود آن تران

اسلام آباد۔ 28 اپریل (اے پی پی) وزیراعظم محمد شہباز شریف پارینے کہ پاکستان امن نا خواہندار ءِ ، ننا امن نا است خواہی  ءِ نزوری تکنگپ، بھارت تینا غیرکانودی کوزہ ٹی جموں وکشمیر اٹی انسانی حق انا بھلا خلاف ورزی تے کننگ ءِ، جہانی زرگزرانی تنکی آن پاکستانی الس ءِ زہمی مننگ کن اِلیپنہ۔ داخیال آتا درشانی ءِ او جمعہ نادے آ پی اے ایف اکیڈمی اصغرخان رسالپور اٹی پاسنگ آئوٹ پریڈ دود آن بطور مہمان خاص تران کرسا کرے۔ اوپارے کہ پاس آئوٹ مروک آ کیڈٹ و اوفتا لمہ و باوہ غاتے مبارکبادی پیش کیوہ، پاک فضائیہ نا اکیڈمی ٹی بڑزکو آب و ڈسپلن ءِ خناٹ بھاز خوشی مسنے، پاس آئوٹ مروک آ کیڈٹ آک آخبت نا میرات آک ءُ، دا کیڈٹ آتے سرسہبی اوفتا پدریسہ خواری و بدل مفروک عزم انا سوب ملانے، پاک فضائیہ ہر چیلنج اٹی ملک انا پن ءِ روشناکرے، پاک فضائیہ مچ آ دنیا ٹی بے مٹ مہارت تخک۔ اوپارے کہ پاک فضائیہ فروری 2019اٹی بھارتی جارحیت نا پبی ورندی ءِ تس ، تدوک آ اِرا عشرہ غاتیٹی قوم دہشت گردی، انتہاپسندی و شدت پسندی تون مون تس، پاک فوج اتون اوار غٹ کانود نافذ کروک آ ادارہ غاک داناسور نا جوانمردی اٹ مقابلہ ءِ کریر، مچ آ قوم پاکستان نا فوج اتون ہم کوپہ سلوک ءِ، یقین ءِ کہ سلہہ بند فوج مدام قوم انا است خواہی تیا پورو سلک۔ اوپارے کہ دنیا ءِ موسمیاتی بدلی تون اوار چندی چیلنج مون تروک ءِ، پاکستان ءِ زرگزرانی ویل مون تروک ءِ، زرگزران ءِ سہی کنڈا دننگ کن ہرممکن کوشست کننگ اُن، ہنداسوب آن میثاق معیشت خوانہ، جہانی زرگزران تنکی آن پاکستانی الس ءِ زہمی مننگ کن الیپنہ، زوت ملک انا زرگزرانی حالیت گچین مریک، اللہ تعالیٰ ملک انا شونداری کن ننے اواری اٹ کاریم کننگ نا توفیق ایتے۔ اوپارے کہ پاکستان پرامن ءُ ملک اسے ولے ننا امن نا است خواہی ءِ نزوری تکنگپ۔ اوپارے کہ بھارت تینا غیرکانودی کوزہ ٹی جموں وکشمیر اٹی انسانی حق انا پاش آن پاش خلاف ورزی ءِ کننگ ءِ، اگست 2019 آن بھارت نا غیرکانودی کوزہ ٹی جموں وکشمیر ءِ زندان اسے ٹی بدل کننگانے، کشمیر نا متکن آ جھیڑہ ءِ کشمیری الس نا است خواہی و اقوام متحدہ نا قرارداد آتا رداٹ ایسر کننگے انتئے کہ دا جھیڑہ ءِ ایسر کننگ آن بیدس ڈیہہ ٹی امن مننگ کپک۔ وزیراعظم پارے کہ غٹ ملک آک خاص وڑاٹ ہمسایہ ملک آتون ہڑتوم آ کنڈآتا دوستانہ تعلقداری تا خواہندار اُن، ڈیہہ ٹی امن کن ہمسایہ ملک آتون اواری اٹ کوشست آتے برجاتخنہ۔ اوپارے کہ گچین منظم و پیشہ ور پاک فضائیہ نا کماشی آ پاک فضائیہ نا سروک ایئر چیف مارشل ظہیر احمد بابر سدھو ءِ مبارکبادی پیش کیوہ۔ داوخت آ وزیراعظم پاس  مروک آ کیڈٹ آتے بیج خلک۔ اوگارڈ آف آنر نا معائنہ ءِ کرے۔ دود اٹی وزیردفاع خواجہ محمد آصف ، بنجائی وزیر حوالکاری و شینکاری مریم اورنگزیب ، پاک فضائیہ نا سروک ایئر چیف مارشل ظہیر احمد بابر سدھو و بڑزکو سول و فوجی کمامدارآک ساڑی ئسر۔