اسلام آباد۔ 31دسمبر (اے پی پی) صدر مملکت ڈاکٹر عارف علوی 9 سال آن ریلیف نا چاری جنوزان اسے منافع تون انشورنس کلیم نا زر تننگ نا پرمان کرسا بنجائی محتسب نا فیصلہ نا برخلاف اسٹیٹ لائف انشورنس کارپوریشن نا اپیل ءِ مسترد کرے۔ ایوان صدر نا کنڈآن جاری بیان نا رداٹ صدر مملکت جنوزان ءِ اَرے نا لائف انشورنس پالیسی نا زر ءِ 9 سال آن تفننگ آ اسٹیٹ لائف نا سرزنش ءِ ہم کرے۔ صدر اسٹیٹ لائف کارپوریشن ءِ کبینی ءِ مون آ تخسا انشورنس اتون جمع مروک منافع ءِ ہم جنوزان ءِ تننگ نا پرمان کرے۔ صدر مملکت پارے کہ اسٹیٹ لائف اَرے نا کنڈآن است انا ناجوڑی ءِ اودیم تخنگ نا بہانہ کرسا جنوزان ءِ کلیم نا ادائیگی آن انکار کریسس وخت اس کہ پالیسی نا جاری کننگ آن مست مجاز میڈیکل آفیسر طبی معائنہ ٹی پالیسی ہولڈر ءِ دراخ جوڑ گوندا۔ صدر مملکت پارے کہ پالیسی نا جاری کننگ آن مست اسٹیٹ لائف تون مبینہ ناجوڑی دریافت کننگ نا غٹ ذریعہ ساڑی ئسک و پالیسی آن مست مبینہ ناجوڑی پک کننگ نا زمواری اسٹیٹ لائف آ عائد مریک ۔ انشورنس کلیم نا تردید کن مبینہ ناجوڑی نا ساڑی گری نا بابت ناقابل تردید شاہدی درکار ءِ، اسٹیٹ لائف نا فیلڈ آفیسر نا اودیم رپورٹ پالیسی نا جاری کننگ نا وخت آ اَرے ءِ جان جوڑ گونداسس۔ صدر مملکت گوندانے کہ کیس انا راستکی تا رداٹ اسٹیٹ لائف نا کنڈآن بدانتظامی پک مریک ہندا خاطران بنجائی محتسب نا پرمان تا برخلاف اسٹیٹ لائف نا اپیل ءِ مسترد کننگک۔ سرجم حوال آتا رداٹ متوفی ملک دلشاد 30 نومبر 2010 آ اسٹیٹ لائف آن 2 لکھ روپئی نا لائف انشورنس پالیسی ہلک، 21 جولائی 2013 آ اَرے نا کزیت آ گودی شبنم دلشاد (غاوتروک ) انشورنس کلیم کن درخواست تس، اَرے نا کنڈآن است انا مرض ءِ اودیم کننگ آ اسٹیٹ لائف جنوزان ءِ زر تننگ آن انکار کریسس غاو تروک بنجائی محتسب تون رابطہ کرے۔ ہرا جنوزان نا حق اٹی پرمان جاری کرے۔ اسٹیٹ لائف بنجائی محتسب نا انشورنس کلیم ادائیگی نا پرمان نا برخلاف صدر مملکت ءِ اپیل دائر کریسس ہرادے صدر مملکت مسترد کرے۔
