سانحہ کارساز ءِ 15 سال مس ولے شہید آتا قربانی تے اینو ہم نن یات کینہ، بنجائی وزیر شازیہ مری

کراچی۔ 18 اکتوبر (اے پی پی) بنجائی وزیر تخفیف نیزگاری و راجی رکھ و پاکستان پیپلزپارٹی نا راہشون شازیہ مری پارینے کہ 18 اکتوبر نا واقعہ ءِ اینو 15 سال مس ولے اینو ہم نن سانحہ کارساز نا شہید آتا قربانی تے یات کینہ۔ او18 اکتوبر سانحہ کارساز نا شہید آتے ویڈیو کلہو اٹی خراج عقیدت پیش کرسا پارے کہ سانحہ کارساز نا غٹ شہید آتے اینو ہم سرخ سلام پیش کینہ۔ اونا پاننگ ئسک کہ 18 اکتوبر 2007 آ لکھ آ بندغ شہید گودی بینظیر بھٹو نا جم وجوش اٹ بخیر کننگ کن کراچی بالی پٹ آ سرمسر ، مخلوق نا سمندر تینا قائد نا مرغن جلاوطنی آن پد وطن آ پدی بننگ آ اودے تاریخی بیابخیراس کریر، داوخت آ مخلوق نا جو ش و ولولہ ہُننگ کون آنبار ئسک۔ بنجائی وزیر پارے کہ کارساز نا ہند آ بیا بخیری ٹی اِرا دھماکہ مس ہراٹی 180 بندغ شہید و 500 آن زیات ٹھپی مسر، اینو ہم سانحہ کارساز نا شہید آتا ہمو غٹ ندارہ یات بریک تو است ہسون مریک، نن سانحہ کارساز نا شہید آتا عظیم قربانی تے داسہ ہم یات کینہ و اوفتے خراج عقیدت پیش کینہ۔ شازیہ مری پارے کہ پیپلزپارٹی دا ملک اٹی جمہوریت نا دوئی کننگ کن بھاز قربانی تسنے، 18 اکتوبر ہمو عظیم قربانی تیان اسہ قربانی نا دے اسے۔