عمران خان ملک اٹی گچین کاری آخا ، انارکی خواہک، سینیٹر پلوشہ خان و سینیٹر افنان اللہ نا اسیجائی پریس کانفرنس

اسلام آباد۔ 18 اکتوبر (اے پی پی) پاکستان پیپلزپارٹی نا سینیٹر پلوشہ خان و مسلم لیگ (ن) نا سینیٹر افنان اللہ ئسک پارینو کہ عمران خان ملک اٹی گچین کاری آخا، انارکی خواہک، اگہ او سنجیدہ ءِ تو پنجاب و کے پی کے نا اسمبلی تے پرغے، گچین کاریک زوت مریرہ، عمران خان پوسکن آ آرمی چیف نا تعیناتی ءِ جھیڑہ ئی کننگ خواہک، جیالہ غاتیان شکست عمران خان ءِ کیدنگ مفننگ ءِ ، آرمی چیف ہاؤس و بنی گالہ ٹی بھلو پرخ اسے ، آصف علی زرداری پاکستان اٹی جمہوریت نا بقانا نشانی ءِ۔ داخیال آتا درشانی ءِ او سے شنبے نادے آ اسیجائی پریس کانفرنس اٹی کرے۔ سینیٹر پلوشہ خان پارے کہ آصف علی زرداری پاکستان اٹی کھپے نا نعرہ ءِ خلک و او جمہوریت نا بقاء نا نشانی نا وڑاٹ مون آ بس۔ اوپارے کہ داخت آ ملک فتنہ و پھسات نا مون اٹی ءِ، عمران خان خواہک کہ ملک اٹی جمہوری عمل ءِ چٹفسا انارکی تالان کننگے ولے نن اودے سرسہب مننگ کن الیپنہ۔ اوپارے کہ پارلیمان اسہ مقدس ءُ ادارہ اسے و عمران اونا اہمیت و تقدس ءِ لتاڑنگ خواہک ولے نن داوڑمننگ کن الیپنہ۔ اوپارے کہ عمران خان کرپشن کرپشن نا رٹ ءِ خلکنے ولے اونا پارسائی نا شاہدی ہم مون آ بننگ ءِ۔ ساڑی آ ضمنی گچین کاری تیٹی عمران خان ولدا دھاندلی نا شئیر ءِ خلک، اصل اٹ ملتان و کراچی ٹی عام ءُ جیالہ سے نا دوتے اٹ شکست عمران خان ءِ کیدنگ مفننگ ءِ ۔ اوپارے کہ عمران خان اگہ خواست کیک کہ او دا اِرا حلقہ غاتیٹی دُوارہ گچین کاری مرے تو ولدا نن ہم دا خواست ءِ کینہ کہ مردان و چارسدہ ٹی ہم دُوارہ گچین کاری مرے انتئے کہ دا حلقہ غاتیٹی پاش آن پاش دھاندلی کننگانے۔ سینیٹر افنان اللہ پارے کہ عمران اسہ ءِ شئیر ءِ وار وار آ خلنگ ءِ ، الس دا شیئر آن تنگ مسنے، دا بندغ الس تون درو کننگ ءِ، گچین کاری تا چرجوئی ٹی اونا بیانیہ فراڈ و درو آ تالان ءِ ، دا لس گچین کاری تیکن سنجیدہ اف، اگہ عمران نیازی واقعی لس گچین کاری تیکن سنجیدہ ءِ و او زوت گچین کاری تے خواہک تو ولدا دا دمدستی وڑاٹ پنجاب و کے پی کے نا صوبائی اسمبلی تے پرغے۔ اوپارے کہ عمران خان نا دور اٹی پی ڈی ایم نا جماعت آک 80آن 90 درسد ضمنی گچین کاری تیٹی سرسہبی دوئی کریر۔ہمووخت آ دا دروغ تڑآ بندغ گچین کاری تے انت اکن کرفتو۔