اسہ تُو اٹی ہزارہ الیکٹرک سپلائی کمپنی  ءِ جوڑ کننگک، وزیر پارلیمانی امور مرتضیٰ جاوید عباسی

ایبٹ آباد۔ 18 اکتوبر (اے پی پی) بنجائی وزیر پارلیمانی امور مرتضیٰ جاوید عباسی پارینے کہ اسہ تُو انا تہہ ٹی ہزارہ الیکٹرک سپلائی کمپنی ءِ جوڑ کننگک،مسلم لیگ (ن) ءِ ہراتم ہم موقع ملا الس نا پبی خذمت ءِ کرے و آخبت ہم کرسا کیک، شاہد خاقان عباسی 2018 ٹی ہزارہ الیکٹرک سپلائی کمپنی نا ایگزیکٹیو آرڈر جاری کرفیسس  اوڑا عملدرآمد مننگ کتو۔ واپڈا ہائیڈرو یونین نا ہزارہ نا چیئرمین جمیل اختر تنولی و ملازم آتا مطالباتی دیوان آن تران کرسا اوپارے کہ وزیراعظم محمد شہباز شریف آن او مانسہرہ جلسہ ٹی ہزارہ الیکٹرک سپلائی کمپنی نا جوڑ کننگ نا پڑو کرفے ، اومیت ءِ کہ بروک آ اسہ تُو اٹی ہزارہ الیکٹرک کمپنی ءِ جوڑ کینہ۔ مرتضیٰ جاوید عباسی پارے کہ کمپنی نا جوڑ کننگ کن بھلو اڑاند و ٹیکنیکل ویل مون آ بسنے ولے ہزارہ الیکٹرک سپلائی کمپنی ءِ ہرحال اٹ جوڑ کننگک۔ داوخت آ مرکزی نائب صدر واپڈا ہائیڈرو یونین چیئرمین ہزارہ سرکل جمیل اختر تنولی پارے کہ ہزارہ کمپنی نا جوڑ کننگ کن بنجائی وزیر مرتضیٰ جاوید عباسی بھلو جہد اس کرینے۔ مریم نواز شریف ، کیپٹن (ر) محمد صفدر، قومی اسمبلی نا باسک سجاد اعوان، ایم پی اے سردار محمد یوسف نا ہم منت واری ءِ ہرفنہ ہرا دا جہد اٹی اوار ءُ۔ اوبنجائی وزیر آن پیسکو ملازم آتے مون تروک ویل ، شہید آتا معاوضہ غاتا زرتس، میٹر ریڈر، لائن مین تون اوار ایلو عملہ نا ہندی بھرتی آن بیدس ایلو ویل آتا ایسر کننگ نا اپیل کرے۔ اوبنجائی وزیر ءِ حوال اٹی پارے کہ ہزارہ سرکل اٹی 4 ارب پنجا کروڑ ریونیو جمع مریک ہرا کمپنی نا جوڑ کننگ اٹ کمکار مریک۔ اوپارے کہ ہزارہ کمپنی نا جوڑ مننگ آن بے روزگار ورناتے ملازمت نا وارخواہی و ہزارہ ٹی صنعت شون ہلیک ہراڑان الس ہم شونہال مریک۔