اسلام آباد۔ 18 اکتوبر (اے پی پی) سپریم کورٹ شاہ زیب خون کیس انا دوبہ دار شاہ رخ جتوئی تون اوار ایلو دوبہ دار آتے فریق آتا نیام اٹ راضی نامہ مننگ نا بنداو آ بری کننگ نا پرمان جاری کرینے۔ عدالت عظمیٰ ٹی باندات نا سماعت ءِ جسٹس اعجاز الاحسن نا کماشی ٹی مسہ باسکی بنچ کرے۔ سماعت اٹی شاہ رخ جتوئی نا وکیل لطیف کھوسہ عدالت ءِ پارے کہ فریق آتا مہالو آن راضی نامہ مسنے ، دوبہ دار آتا دہشت تالان کننگ نا ہچ ءُ ارادہ اس اَلوکہ، خون نا واقع ءِ دہشت گردی نا رنگ تننگا۔ عدالت عظمیٰ دا وخت آ شاہ زیب خون کیس انا دوبہ دار شاہ رخ جتوئی تون اوار ایلو دوبہ دار آتے بری کننگ نا پرمان جاری کرسا باندات ءِ سرتسنے۔ شاہ زیب خون کیس اٹی ٹرائل کورٹ شاہ رخ جتوئی و نواب سراج تالپور ءِ پاہو نا سزا و نواب سجاد غلام مرتضیٰ ءِ عمر قید بنفیسس، سندھ ہائی کورٹ ٹرائل کورٹ نا فیصلہ ءِ بدل کرسا اے ٹی اے نا رداٹ ہر چار آ دوبہ دار آتے عمر قید نا سزا بنفیسس، دوبہ دار آک عمر قید نا برخلاف سپریم کورٹ اٹی اپیل دائر کریسر ہرادے داسہ سرتننگانے۔
