سکھر۔ 18 اکتوبر (اے پی پی) پاکستان اٹی ڈبلیو ایچ او نا نمائندہ ڈاکٹر پلیتھا ماہیپالا پارینے کہ جہانی ادارہ جان جوڑی سندھ انا نوکاپ آن زہمی علاقہ غاتیٹی جان جوڑی نا خذمت آتا فراوانی ٹی کمک کننگ ءِو سندھ انا محکمہ جان جوڑی ءِ المی دوائی، طبی ازباب و سپلائیز ، غذائی سپلیمنٹ فراوان کرسا کمک فراوان کننگ ءِ وخت اس کہ صوبہ ٹی جان جوڑی نا نوکاپ و پِر تیان بھس مروک انفراسٹرکچر نا بحالی نا کاریم ءِ ہم کننگ ءِ۔ داہیت ءِ او تدوک آ دے ڈبلیو ایچ او سکھر حب اٹی محکمہ جان جوڑی سندھ ءِ دوائی و المی گڑا دوٹی تننگ نا دود آن تران کرسا پارے۔ محکمہ جان جوڑی سندھ انا کنڈآن ڈائریکٹر جنرل ہیلتھ سندھ ڈاکٹر محمد جمن باہوتو گڑاتے وصول کرے۔ داوخت آ ڈبلیو ایچ او سندھ انا سروک ڈاکٹر سارہ سلمان، سکھر ولاڑکانہ ڈویژن نا ڈسٹرکٹ ہیلتھ آفیسر ، چندی ہسپتال آتا میڈیکل سپرنٹنڈنٹ آک ہم ساڑی ئسر۔ ڈاکٹر پالیتھا ماہیپالا دود آن تران کرسا پارے کہ نوکاپ و پِر انا ایمرجنسی بھلو کچ اسے آ جان و مال ءِ نسخان تسنے و غٹ آن زیات زہمی مروک آ بشخ جان جوڑی نا ءِ۔ اوپارے کہ 2000 جان جوڑی نا آسراتی فراوان کروک آ ہسپتال و جان جوڑی نا ہندآک بھس مسنو، ہراکہ صوبہ ٹی جان جوڑی نا کل آسراتی تا 12 درسد ءِ۔ ڈاکٹر پالیتھا پارے کہ ڈبلیو ایچ او ، محکمہ جان جوڑی سندھ انا کمک ءِ برجاتخک۔ اوپارے کہ بنداوی چکار ملیریا، دیر آن ودی مروک آ ناجوڑی نا تالانی نا مون ءِ توننگ و چناتیٹی غذائیت نا کمتی ءِ مر کننگ کن نیوٹریشن سٹیبلائزیشن سینٹر(این ایس سی) جوڑ کننگ ءِ و دا چرجوئی ٹی صوبہ ٹی 19 پوسکن ءُ نیو ٹریشن سٹیبلائزیشن سینٹر جوڑ کننگ انگ ءِ۔ داوخت آ تران کرسا ڈائریکٹر جنرل ہیلتھ سندھ ڈاکٹر محمد جمن باہوٹو سندھ اٹی نوکاپ آن زہمی بندغ آتا امداد و بحالی نا کوشست آتیٹی فعال کڑد آ ڈبلیو ایچ او نا منت واری ءِہرفے۔ اوپارے کہ ڈبلیو ایچ او نا کمک اٹ محکمہ جان جوڑی سندھ بھاز انگا ہیلتھ کیمپ جوڑ کننگ اٹ سرسہب مسنے و ہمو علاقہ غاتسکان سرمسنے ہراڑے مخلوق داسہ ہم دیر اٹی ءُ۔ اوپارے کہ محکمہ جان جوڑی ڈبلیو ایچ او نا کمک اٹ صوبہ ٹی 10ملین آن زیات زہمی بندغ آتا خیال ءِ تخنگ کن کیمپ جوڑ کرینے۔ داخت آ ٹی ایچ کیو ہسپتال روہڑی ءِ لیبر روم و گائنی وارڈ اکن المی گڑاہم فراوان کننگا۔ داکان مست ڈبلیو ایچ او ڈی ایچ کیو قمبر شہداد کوٹ و سول ہسپتال دادو ءِ اِرا واٹر پیوریفیکیشن پلانٹ ہم عطیہ کرینے ہرا اسہ گھنٹہ ٹی 4000 لیٹر دیر ءِ ساف کننگ کیک۔ واٹر پیوریفیکیشن پلانٹ آک نئے بیرہ ہسپتال نا ناجوڑ بلکن علاقہ نا مخلوق ءِ ہم کنوئی ءُ ساف دیر ایترہ۔ دوائی و طبی گڑاتیٹی چناتا نشوونما و غذائی گرج آتے پورو کننگ کن ایف ۷۵ و ایف ۱۰۰ سپلیمنٹ پال، لیبرروم تیکن ازباب، سکشن مشین، الٹراساؤنڈ، ایئر کنڈیشنر، ملیریا و ایلو ناجوڑی تا ٹیسٹنگ کٹ و دوائی فراوان کننگانے۔
