اسلام آباد۔14اکتوبر (اے پی پی): مزن وزیر محمد شہباز شریف ءَ گشتگ کہ گوستگیں ماہ شنگھائی کمک تنظیم ءِ دیوان ءَ پد سیکا سروکی دیوان ءَ مئے دلگوشی پاکستان ءِ توانائی، بیپاری ءُ دمگی نزیکیانی سرءَ بوتگ، درنیامی ایشیائی ریاست آنی گوما جہلیں نزیکی مئے حکومت ءِ دری پالیسی آنی بنکی مول ءُ مراد اِنت، ما یکجاہی دری پالیسی لوٹاں کہ عمران خان ءِ حکومت ءِ دورءَ آماچ بوتگ۔ جمعہ ءِ روچءَ وتی ٹویٹ ءِ تہا مزن وزیر شہباز شریف ءَ گشتگ کہ جنوبی ءُ درنیامی ایشیا ءِ وتی وتی ارزشت اَنت کہ ایشانی گوما کمک ءَ را گیش کنگ درستانی پائدگ اِنت۔ مزن وزیر ءَ گشتگ کہ میاں اوستمانی راہشوناں وتی گندء ُ نندانی تہا اقتصادی ءُ بیپاری نزیکی ءِ سرءَ گپ ءُ ترا ن بوتگ، سیکا سروکی دیوان ء ُ ایس سی او دیوان ءَ توانائی ، بیپاری ءُ دمگی نزیکیانی سرءَ پاکستان ءِ دلگوشی بوتگ۔ میاں اوستمانی راہشونانی گوما گندءُ نند ء َ پاکستان ءَ را بیپار دوستیں ملک ءِ ردءَ پیش کنگ بیت۔
