اسلام آباد۔ 14 اکتوبر (اے پی پی) قومی اسمبلی ءِ پاننگانے کہ سی پیک نا فریم ورک انا رداٹ 18.8 ارب ڈالر نا خڑچ آن 28 ڈٹ آتے پورو کننگانے۔ داہیت ءِ وزارت ڈٹ بندی و شونداری و خصوصی گام گیج انا کنڈآن اسمبلی نا باسک شمس النساء نا سوج انا ورندی ٹی نوشتہی ورندی ٹی پاننگا۔ وزارت ڈٹ بندی نا رداٹ 18.8 ارب ڈالر نامالیت آن ہرا 28 ڈٹ آتے پورو کننگانے اوفتے ٹی توانائی نا بشخ اٹی 12، بنداوی پنجر و شونداری نا 10 و راجی و اقتصادی بشخ انا 6 ڈٹ اوار ءُ۔ پنجاب اٹی 6.28 ارب ڈالر نا خڑچ آن 6 ڈٹ، سندھ اٹی 6.43 ارب ڈالر نا خڑچ آن 7، خیبرپختونخوا ٹی 2.01 ارب ڈالر نا خڑچ آن اِرٹ، بلوچستان اٹی 2.40 ارب ڈالر نا خڑچ آن 6، گلگت بلتستان اٹی 0.02 ارب ڈالر نا خڑچ آن اسہ ڈٹ و آزاد جموں وکشمیر و اسلام آباد اٹی ہم اسہ ڈٹ اسے پورو کننگا۔ ایوان ءِ پاننگاکہ دا غٹ بھلا ڈٹ آتے وخت آہی پورو کننگ انگ ءِ، مریس مدتی ڈٹ آتیا ہراِرا سال آن پد نظرثانی کننگک۔ ایوان ءِ پاننگاکہ داوخت آ سی پیک نا رداٹ 9 خصوصی اقتصادی زون تا جوڑ کننگ آ امنا کننگانے ہرافتے ٹی علامہ اقبال انڈسٹریل سٹی،رشکئی خصوصی اقتصادی زون، بوستان خصوصی اقتصادی زون و دہابیجی خصوصی اقتصادی زون اوار ءُ۔
