اسلام آباد۔ 14 اکتوبر (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ حکومت ملک اٹی جوان و پائیدار اقتصادی نمو کن گام گیج کننگ اٹی ءِ، حکومت پاکستان آئی ایم ایف نا پروگرام ءِ پورو کننگ کن سنبرینگوک ءِ۔ اوداہیت ءِ واشنگٹن ڈی سی ٹی جہانی مالیاتی فنڈ و جہانی بینک انا بڑزکو عہدیدار و کثیر الجہتی شریدار آتون اوڑدہی تیٹی پارے۔ وزیرخزانہ واشنگٹن ڈی سی ٹی آئی ایم ایف نا ڈپٹی منیجنگ ڈائریکٹر ہ اینٹونیٹ سائیہ تون اوڑدہی کرے۔ وزیرخزانہ اودے پاکستان اٹی بھلا نوکاپ آن مروک آ نسخان و زرگزران ءِ سوگو و پائیدار جوڑ کننگ آن بیدس اونا بحالی کن حکومت پاکستان نا وژن آن معلومدار کرے۔ ایم ایف نا ڈپٹی منیجنگ ڈائریکٹر حکومت نا پالیسی تا ستاءِ کرے و آئی ایم ایف نا کنڈآن پاکستان ءِ کمکاری ءِ برجاتخنگ نا باوری کرفے۔ وزیرخزانہ جہانی بینک انا صدر ڈیوڈ مالپاس تون اوڑدہی ٹی پاکستان نا راجی اقتصادی شونداری ٹی پدریسہ کمکاری آ بینک انا منت واری ءِ ہرفے۔ اوبھلا بھسکار نوکاپ آن پد بچنگ و کمکی کارروائی تیٹی کمک آ جہانی بینک انا منت واری ءِ ہرفے۔ صدر مالپاس باوری کرفے کہ بینک پاکستان ءِ نوکاپ نا سوب آن راجی و اقتصادی چیلنج آتا مون ءِ توننگ اٹ کمک کننگ کن حکومت پاکستان تون اواری اٹ کاریم کرسا کیک۔ وزیرخزانہ سویلی ایشیا کن جہانی بینک انا نائب صدر مارٹن رائزر تون ہم اوڑدہی کرے، اونائب صدر رائسر نا پاکستان نا دورہ غا منت واری ءِ ہرفے و پارے کہ دا دورہ بھسکار نوکاپ آن مروک آ زبردست نسخان تا کساس ءِ خلنگ اٹ کمک فراوان کرے۔ نائب صدر باوری کرفے کہ بینک دا زرگزرانی مشکل آتا مون ءِ توننگ اٹ پاکستان نا مخ تفی ءِ برجاتخک ہرافتا ملک ءِمون تروک ءِ۔ وزیرخزانہ اسلامی شونداری بینک انا صدر ڈاکٹر محمد سلیمان الجاسر تون اوڑدہی کرے و اسلامی شونداری بینک انا پاکستان تون پدریسہ رابطہ غاتیا منت واری ءِ ہرفے۔ اوداہیت انا ستاءِ کرے کہ پاکستان و بینک کیہی دہائی آن پت انا قابل شریدار رہینگانو۔ صدر الجاسر نوکاپ زہمی تے ریلیف فراوان کرسا زرگزران ءِ سوگو کننگ کن حکومت پاکستان نا کنڈآن کروک آ گام گیج آتا ستاءِ کرے۔ وزیرخزانہ ڈوئچے بینک و جے پی مورگن نا کماش آتون تینا اوڑدہی ٹی زرگزران ءِ سوگو کننگ تون اوار اوار نوکاپ زہمی تے ریلیف فراوان کننگ نا حکومتی وژن نا وضاحت کرے و باوری کرفے کہ حکومت پاکستان آئی ایم ایف نا پروگرام ءِ پورو کننگ اٹ سنبرینگوک ءِ۔ ڈل ریٹنگ ایجنسی تتون ہم اوڑدہی کرے و سالانہ دیوان تیٹی اڈ ہلوک آ چندی دود آتیٹی بشخ ہلک۔ پاکستانی ڈل پاکستان ہاؤس اٹی پاکستانی کسبی بندغ آتا اسہ گیشتر ٹولی اسے تون ہم اوڑدہی کرے ہرافتے ٹی پنی آکاروباری شخصیت، ٹیک انٹرپرینیورز و ایلوفک اوار ئسر۔ وزیرخزانہ واشنگٹن ڈی سی ٹی مروک آ آئی ایم ایف/ورلڈ بینک انا 2022 نا سالانہ دیوان تیٹی پاکستان نا ڈل انا کماشی ءِ کننگ اٹی ءِ۔ ایلو مندوبین آتیٹی بنجائی وزیر اقتصادی امور سردار ایاز صادق، وزیر مملکت خزانہ و محصولات ڈاکٹر عائشہ غوث پاشا، گورنر اسٹیٹ بینک آف پاکستان جمیل احمد، سیکرٹری خزانہ حمید یعقوب شیخ ، ڈاکٹر کاظم احمد اوار ءُ۔ سیکرٹری اقتصادی امور ڈویژن نیاز و ایڈیشنل سیکرٹری فنانس ڈویژن جناب علی طاہر ئسک ہم اوار ئسر۔
