آستانہ۔ 14 اکتوبر (اے پی پی) پاکستان و بیلاروس اسیجائی اقتصادی کمیشن نا بروک آ دیوان ءِ زوت اڈتننگ و اونا پیروی ءِ پک کننگ آ امنا کریر ہراڑآن ہڑتوم آ کنڈآتا اقتصادی رابطہ غاتے سوگوی ملک۔ وزیراعظم آفس میڈیا ونگ آن جاری بیان نا رداٹ وزیراعظم محمد شہباز شریف آستانہ ٹی سیکا نا شش میکو سروکی دیوان نا وخت آ بیلاروس نا صدر الیگزینڈر لوکاشینکو تون اوڑدہی کرے۔ اوڑدہی ٹی ہڑتوم آ راہشونک برجا ہڑتوم آ کنڈآتا کمکاری نا جاچ ءِ ہلکر و تین پہ تینی است خواہی نا علاقائی و جہانی امور آ گپ وتران کریر۔ صدر لوکا شینکو پارے کہ بیلاروس چاگڑدی بدلی نا نتیجہ ٹی بروک آ نوکاپ پاکستان اٹی بھلو بھسکاری اس کرے و بیلاروس زہمی تا بحالی کن ہرممکن کمک فراوان کیک۔ وزیراعظم پاکستان و بیلاروس نا نیام اٹ کمکاری نا غٹ ممکنہ بشخ آتیٹی رابطہ غاتے ودفسا دوستانہ تعلقداری تے پین سوگو کننگ نا است خواہی نا درشانی ءِ کرے۔ ہڑتوم آ راہشونک پاکستان بیلاروس اسیجائی اقتصادی کمیشن نا بروک آ دیوان ءِ زوت آن زوت اڈتننگ و اونا پیروی ءِ پک کننگ آ امنا کریر ہراڑآن ہڑتوم آ کنڈآتا اقتصادی رابطہ غاتے سوگوی ملک۔ علاقائی امور آ گپ وتران کرسا ہڑتوم آ راہشونک امن، سوگوی و کمکاری ءِ مون آ دننگ نا تین پہ تینی است خواہی نا درشانی ءِ کریر۔ ہڑتوم آ راہشونک داکان مست 15 ستمبر 2022 آ سمرقند اٹی شنگھائی کمکار تنظیم نا سروکی دیوان نا وخت آ اوڑدہی ٹی کریسر۔اسہ تُو اٹی اِراوار سرکڑدہ نا کہول آ گپ وتران چندی بشخ آتیٹی تین پہ تینی فائدہ ئی کمکاری ءِ ودفنگ کن ہڑتوم آ کنڈآتا بھاز است خواہی نا ڈیک ءِ ایتک۔
