اسلام آباد۔ 14 اکتوبر (اے پی پی) وزیراعظم محمد شہباز شریف پارینے کہ چین و پاکستان نا سنگتی بے مٹ ءِ، چین ہر تہہ و پیشن نا پڑ آ پاکستان تون تفینے و ہر مشکل وخت اٹی پاکستان نا کمک کن ساڑی مسنے۔ وزیراعظم آفس میڈیا ونگ آن جاری بیان نا رداٹ وزیراعظم تون چائنا نیشنل نیو کلیئر کارپوریشن اوورسیز نا ڈل جمعہ نادے آ اسلام آباد اٹی اوڑدہی کرے۔ ڈل انا کماشی ءِچائنا نیشنل نیو کلیئر کارپوریشن اوورسیز نا صدر زانگ گیولیانگ کرے۔ اوڑدہی ٹی وزیراعظم پارے کہ چین و پاکستان نا سنگتی بے مٹ ءِ، چین ہر تہہ و پیشن نا پڑآ پاکستان تون تفینے و ہرمشکل وخت اٹی پاکستان نا کمک کن ساڑی مسنے۔ اوپارے کہ ساڑی آ نوکاپ آن مروک آ بھسکاری نا مقابلہ ءِ کننگ و نوکاپ زہمی تا بحالی کن برجاکاریم تیٹی چین پاکستان نا بھاز کمک ءِ کرے۔ چائنا نیشنل نیو کلیئر کارپوریشن اوورسیز نا کنڈآن نوکاپ زہمی تا بحالی کن اسہ بھلو زراسے نا چیک اس ہم وزیراعظم نا فلڈ ریلیف فنڈ اکن پیش کننگا۔ اوڑدہی ٹی وزیر مملکت پیٹرولیم مصدق ملک، وزیراعظم نا خصوصی کمکار طارق فاطمی ، ظفرالدین محمود و پاکستان اٹی چین نا سفیر نون رانگ ئسک ہم بشخ ہلکر۔
