اقوام متحدہ۔ 14 اکتوبر (اے پی پی) اقوام متحدہ ٹی پاکستان نا آخبتی مندوب منیر اکرم سلامتی کونسل نا صدر تون اوڑدہی کرے و وزیرخارجہ بلاول بھٹو زرداری نا چٹھی ءِ اونا دوٹی تس ہراٹی او بھارت نا غیرکانودی کوزہ گیری ٹی جموں وکشمیر نا خطرناک حالیت آتا بارواٹ معلومدار کرینے، اکتوبر کن سلامتی کونسل نا کماشی گیبون نا سفارت کار مائیکل بیانگ تون ءِ۔ اقوام متحدہ ٹی پاکستان نا مشن نا کنڈآن جاری بیان نا رداٹ تینا چٹھی ٹی بلاول بھٹو زرداری سلامتی کونسل و اقوام متحدہ نا جنرل سیکرٹری انتونیوگوتریش آ زور شاغانے کہ او جموں و کشمیر نا ویل انا سلامتی کونسل نا قرارداد و کشمیری الس نا است خواہی تا رداٹ ایسر کرفنگ کن پبی گام گیج کے۔ پاکستانی مندوب داکان مست جنرل اسمبلی نا اسپیشل پولیٹکل اینڈ ڈی کالونائزیشن (فورتھ) کمیٹی نا دیوان آن تران اٹی جموں و کشمیر آ بھارت نا غیرکانودی کوزہ گیری ءِ پوسکن آ دور انا نوآبادیاتی نظام نا بدترین درشانی اس گوندسا عشرہ غاتیان ایسر نا چاری دا ویل ءِ ایسر کننگ نا گرج آ زور شاغا۔ اوپارے کہ 1946 آن پد آن داتم اسکان 80 مسکوہی نوآبادیاتی آجوئی دوئی کرینو ولے گڑاس مخلوق ءِ داسہ ہم حق خودارادیت تننگ آن انکار کننگ انگ ءِ و بھارت نا غیر کانودی کوزہ گیری ٹی جموں و کشمیر و فلسطین اونا نمان درور آک ءُ۔
