آستانہ۔13اکتوبر (اے پی پی): مزن وزیر محمد شہباز شریف ءَ گوں فسطین ءِ صدر محمود عباس ءَ پنچ شمبے ءِ روچءَ گندء ُنندکتگ، دوئیں راہشونانی نیام ءَ جوانیں گپ ء ُتران بوتگ ء ُ آیانی جزبگی گپ ء ُترا ن اسلامی وت مہ وتی ء ُ برات مہ براتی ءِ درورجوڑ بوتگ۔ محمود عباس ءَ گوں جوش جزبگ ءَ مزن وزیر شہباز شریف ءِ دوئیں دست گپتگ اَنت۔ مزن وزیر کارگس ءِ میڈیا و نگ ءَ چہ جاری بیان ءِ ردءَ فلسطین ءِ صدر ء ُ مزن وزیر شہباز شریف گوں یکے دومی ءَ گلائش بوتگ اَنت۔ مزن وزیر محمد شہباز شریف ءَ فلسطین ءِ صدر ءَ گوں گپ ء ُتران کتگء ُ گشتگ کہ ہارءِ وہد شمے کمک کنگءِ باز منت وار اَں۔ محمود عباس ءَ گشتگ کہ پاکستان مئے لوگ اِنت، پاکستانی مئے براتء ُ گہار اَنت، پاکستانی مئے لوگ ءِ مردم اَنت، ما پہ آیاں ایچ ناکتگ۔ مزن وزیر محمد شہباز شریف ءَ گشتگ کہ اے وڑ مگش ، فلسطین ءَ ہار ءِ آماچیں مردمانی سک باز کمک کتگ ایشی ءَ را ما ایچ وڑءَ شموشت ناکناں، پاکستان کدی فلسطینی آناں شموشت ناکنت۔، فلسطینی صدر محمود عباس ءَ گشتگ کہ پاکستان ءَ را کدی ہم شموشت ناکناں، یک سد سالاں چہ ما پاکستانی آناں ناشموشتگ، مفتی فلسطین وتی بیران بوہگءَ تاں پاکستان ءَ بوتگ، آئی ءِ چارء ُ گزار پاکستان ءَ کتگ، پاکستان جوڑ بوہگءَچہ پیسر ما پاکستانی گوما بوتگ اَنت۔ مزن وزیر ءَ گشتگ کہ فلسطین مئے ایمان ءِ بہر اِنت، فلسطین مئے دل ءِ تہا اِنت۔ آئیءَ گشتگ کہ مرچیگیں کانفرنس ءِ تہا پاکستان ءِ منوکیں راہشوناں ہوار اِنت ، شمے ہمراہ داری ءُ جزبگ ءِ دل ءِ جہلانک ءَ شکرء ُمنت ۔
