نوکاپ زہمی تا بحالی پاکستان کن بھاز بھلو چیلنج اسے، سیکا نا باسک ملک آک ڈیہہ ٹی امن و کمکاری ءِ ودفنگ کن تینا پبی کڑد ءِ ادا کیر، وزیراعظم شہباز شریف نا سیکا نا شش میکو سروکی دیوان آن تران

آستانہ۔ 13 اکتوبر (اے پی پی) وزیراعظم محمد شہباز شریف پارینے کہ پاکستان نا 3 کروڑ آن زیات زہمی تا بحالی بھاز بھلو چیلنج اسے، اوفتا آبادکاری ٹی دہائیک لگرہ، سیکا نا باسک ملک آک ڈیہہ ٹی امن و کمکاری ءِ ودفنگ کن تینا پبی کڑد ءِ ادا کیر، بھارت تینا غیرکانودی کوزہ گیری ٹی جموں وکشمیر اٹی فوجی واک ءِ کاریم اٹ اتسا غاصبانہ کوزہ و کشمیری تے اوفتا حق خودارادیت آن محروم کرینے، پاکستان بھارت تون سنجیدہ و بامعنی گپ وتران کن تیار ءِ، جہانی برادری اوغانستان اٹی پائیدار امن کن کڑد ادا کے، سی پیک آن مچ آ ڈیہہ کن اقتصادی وارخواہی ودی مریک۔ پنچ شنبےنادے آ قازقستان نا دارالحکومت آستانہ ٹی سیکا نا شش میکو سروکی دیوان آن تران کرسا وزیراعظم محمد شہباز شریف سیکا نا پلیٹ فارم ءِ بھاز اہمیت تخوک گوندا۔ اوپارے کہ ڈیہہ ٹی کمکاری ءِ ودفنگ و پت سازی نا بابت سیکا اہم ءُ کڑد اس ادا کننگ کیک، وزیراعظم پارے کہ پاکستان ءِ چاگڑدی بدلی تا سوب آن بھلا حالیت آتا مون تروک ءِ، ساڑی آ نوکاپ و پِر تیان ملک انا اسہ سے چارک بشخ اس دیر اٹی ڈبنگوک ءِ و ارب آ ڈالر آتا نسخان مسنے، 1600 بندغ جون تیان دوتے سلانو، وخت اس کہ ہزار آ کلومیٹر سڑک و پول آتے دیر درینے و لکھ آ ایکڑآ سلوک فصل آک بھس مسنو۔ وزیراعظم پارے کہ چاگڑدی کچٹی ٹی پاکستان نا بشخ اسہ درسد آن ہم کم ءِ ولے پاکستان داڑان غٹ آن زیات زہمی ملک آتیٹی اوار ءِ۔ اوپارے کہ نوکاپ زہمی تا بحالی کن پاکستان غٹ وسیلہ غاتے کاریم اٹ اتنگ ءِ، پاکستان سنگت ملک آتون امداد آ اوفتا منت وار ءِ، پاکستان اٹی 3 کروڑ آن زیات نوکاپ زہمی تا بحالی بھاز بھلو چیلنج اسے، اقوام متحدہ نا سیکرٹری جنرل نا دورہ پاکستان نا منت واری ءِ ہرفیوہ، اقوام متحدہ نا کنڈآن 816 ملین ڈالر نا امداد نا ساڑی آ اپیل ستاکڑزک۔ وزیراعظم پارے کہ اوغانستان اٹی پائیدار امن کن جہانی برادری تینا کڑد ءِ ادا کے۔ وزیراعظم پارے کہ پاکستان دہائی تیان 40 لکھ اوغان باہوٹ آتا مہمانداری ءِ کننگ ءِ، نن دہشت گردی نا برخلاف جنگ اٹی بھلو قربانی تسونن۔ وزیراعظم پارے کہ بھارت تینا غیرکانودی کوزہ گیری ٹی جموں و کشمیر اٹی فوجی واک ءِ کاریم اٹ اتسا غاصبانہ کوزہ کرینے و کشمیری تے اوفتا حق خودارادیت آن محروم کرینے۔ بھارت تینا ملک اٹی رہینگوک آ اقلیت و ہمسایہ غاتیکن خطرہ اس جوڑ مسنے۔ وزیراعظم شہباز شریف پارے کہ پاکستان بھارت تون اوار غٹ ہمسایہ غاتون پرامن تعلقداری تا خواہندار ءِ، ننے تینا الس ءِ جان جوڑی، تعلیم و روزگار تننگ کن زیات وسیلہ  جتا کننگ نا گرج ءِ۔ اوپارے کہ نن بھارت تون گپ وتران کن تیار اُن ولے سنجیدہ، بامعنی و بھرمی مذاکرات کن بھارت ءِ گام گیج کننگ نا گرج ءِ۔ وزیراعظم دے ٹکی نیامی ٹی پائیدار امن کن فلسطین نا ویل ءِ ایسر کننگ نا گرج آ ہم زور شاغا۔ اوسی پیک ءِ مچ آ ڈیہہ نا شونداری کن اہم گوندسا پارے کہ سی پیک روڈ اینڈ بیلٹ نا اہم ءُ ڈٹ اسے داڑان پاکستان تون اوار مچ آ ڈیہہ ٹی واپاری سرجزآک ودرہ۔