اسلام آباد۔ 12 اکتوبر (اے پی پی) اسپیکر قومی اسمبلی راجہ پرویز اشرف تون چارشنبےنادے آ بنجائی وزیر توانائی خرم دستگیر خان اوڑدہی کرے ہراٹی ملک انا جم زرگزرانی و سیاسی حالیت و گوجر خان اٹی الس ءِ توانائی نا بابت مون تروک ویل آتیا گپ وتران کننگا۔ اسپیکر دا وخت آ گپ وتران کرسا پارے کہ پارلیمان الس نا نمائندہ ادارہ ءِ و السءِ پارلیمان تون بھاز زیات اومیت وابستہ ءِ۔ پارلیمان الس ءِ مون تروک ویل آتا ایسری کن گچین کانود جوڑ کننگ اٹی ءِ۔ ساڑی حکومت نا گچین زرگزرانی پالیسی تیان ملکی زرگزران سوگو مسنے۔ اسپیکر وزارت توانائی نا کنڈآن ملک آن لوڈشیڈنگ نا چٹفنگ و نوکاپ زہمی علاقہ غاتیٹی بجلی نا انفراسٹرکچر نا بحالی کن کروک آ گام گیج آتیا است جمی نا درشانی ءِ کرے و پارت کرے کہ گوجر خان و اوڑتون کیبی علاقہ غاتا الس ءِ بجلی نا بابت مون تروک ویل آتے ایسر کننگے و بجلی نا بے سلنگ آن فراوانی ءِ پک کننگ کن گام گیج کننگے۔ اسپیکر بجلی نا بل آتیٹی ریلیف فراوان کننگ کن شمسی توانائی و توانائی نا ایلو قابل تجدید ذریعہ اٹ بجلی دوئی کننگ ءِ اولیت تننگ نا گرج آ زور شاغا و پارے کہ ملک اٹی توانائی تنکی و ایلو ویل آتا مون ءِ توننگ کن اواری اٹ کاریم کننگ نا گرج ءِ۔ وزیر توانائی خرم دستگیر خان پارے کہ ساڑی حکومت الس ءِ بجلی نا مد اٹی ریلیف فراوان کننگ کن اہم گام گیج کننگ ءِ۔ وزیراعظم محمد شہباز شریف نا پارت آ بجلی نا مد اٹی الس ءِ 55 ارب روپئی نا ریلیف فراوان کننگانے۔ ساڑی آ نوکاپ اٹی بجلی نا انفراسٹرکچر بھاز بے وڑ زہمی مسنے۔ نوکاپ زہمی علاقہ غاتیٹی زہمی تے بجلی نا مد اٹی 10 ارب روپئی نا ریلیف تننگ انگ ءِ۔ بنجائی وزیر اسپیکر ءِ گوجر خان اٹی بجلی نا بابت الس مون تروک ویل آتے اولیتی بنداو تیا ایسر کننگ نا باوری کرفے۔
