حکومت پِر و نوکاپ آن زہمی خواری کش ، مزور  آتے تنیا اِلیپک، ساجد حسین طوری

کوئٹہ۔ 12 اکتوبر (اے پی پی) بنجائی وزیر سمندر پار پاکستانیز ساجد حسین طوری پارینے کہ پِر و نوکاپ آن زہمی مزور آتے وخت آ امداد نا فراوانی وخت انا اولیت  ءِ تانکہ او تینانت تیا سلنگ کیر، بنجائی حکومت خواری کش ، مزور و آخبت نا جوڑ کروک آتے اسُل تنیا اِلیپک۔ داہیت ءِ او چارشنبے نادے آ کوئٹہ نا نوکاپ زہمی علاقہ ہنہ اوڑک نا دورہ نا وخت آ گپ وتران کرسا پارے۔ داوخت آ صوبائی سلاہکار لیبر نوابزادہ گہرام خان بگٹی، آئی ایل او نا ڈل و آل پاکستان لیبر ز فیڈریشن نا عہدیدار  پاکستان پیپلزپارٹی بلوچستان نا عہدیدار آک ہم بنجائی وزیر ساجد حسین طوری تون اوار ئسر، بنجائی وزیر سمندر پار پاکستانیز ساجد حسین طوری نوکاپ زہمی تتون ملا و نوکاپ آن بھسکاری تا جاچ ءِ ہلس ہنہ اوڑک اٹی آئی ایل او نا پروجیکٹ کیش فارورک انا بناءِ کرے۔ داوخت آ بنجائی وزیر سمندر پار پاکستانیز ساجد حسین طوری پارے کہ بلوچستان اٹی نوکاپ نا بھسکاری تے خناٹ بھاز است ہسونی مننگ ءِ نوکاپ آن ہڑدے ئی اجرت و صنعتی مزور غٹ آن زیات زہمی مسنو، کنا وزارت و آئی ایل او واری اٹ کیش فارورک انا بناءِ کرینو، کیش فار ورک انا رداٹ مزور آک تینا اُراتا بحالی آ کاریم کیرہ ہرانا اوفتے ہڑدے ئی اجرت ءِ ادا کننگک، مزور آتے بے روزگاری آن بچفنگ اولیت ءِ، ای آئی ایل او نا منت وار اُٹ ہرا مزور آتے وخت آ روزگار فراوان کننگ اٹ کمک فراوان کننگ نا عزم تخک، آئی ایل او تون اواری اٹ زہمی لیبر ورکرآتا بحالی نا بناءِ بلوچستان آن کننگ اُن، بلاول بھٹو زرداری نا پارت ءِ کہ لیبر آتا روزگار  دمدستی بحال مرے۔ بنجائی وزیر سمندر پار پاکستانیز پارے کہ پِر و نوکاپ آن زہمی مزور آتے وخت آ امداد فراوان کننگ المی ءِ، آئی ایل او تون اوار جہانی محکمہ غاتے تینا وزارت نا کنڈآن پورو کمکاری نا باوری کرفیوہ، کنے یقین ءِ کہ ننا مزور آک زوت تینا نت تیا سلرہ انتئے کہ نن اوفتے تون تفوک اُن و بنجائی حکومت خواری کش ، مزور آتے اسُل تنیا اِلیپک۔