وزیراعظم شہباز شریف سیکا نا شش میکو سروکی دیوان اٹی بشخ ہلنگ کن اینو قزاخستان آ روانہ مریک

اسلام آباد۔ 12 اکتوبر (اے پی پی) وزیراعظم محمد شہباز شریف سیکا نا شش میکو سروکی دیوان اٹی بشخ ہلنگ کن اینو (چارشنبے نادے آ) داسہ زرہ سے آن پد قزاخستان کن روانہ مریک۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف ایشیا ٹی تعامل و پت سازی نا گام گیج آتیا کانفرنس نا شش میکو سروکی دیوان اٹی بشخ ہلنگ کن زرہ سے آن پد قزاخستان کن روانہ مریک ۔ وزیراعظم شہباز شریف 12، 13 اکتوبر 2022 آ قزاخستان نا دارالحکومت آستانہ اٹی سیکا (CICA) نا شش میکو سروکی دیوان اٹی بشخ ہلیک۔ کابینہ نا باسک و بڑزکو کمامدار آتیا تالان ڈل وزیراعظم تون اوار مریک۔ وزیراعظم 13 اکتوبر 2022 آ سیکا نا دیوان آن تران کیک۔ او اسیجائی چیلنج آتون مون تننگ کن مچ آ ایشیا نا ملک آتا نیام اٹ گپ وتران، افہام و تفہیم و کمکاری ءِ مون آ دننگ کن اسہ یکتا فورم اسے نا وڑاٹ سیکا نا اہمیت ءِ پیدوار کیک۔ وزیراعظم علاقائی و جہانی ویل آتیا پاکستان نا نقطہ نظر ءِ ہم تالان کیک۔ سروکی دیوان نا وخت آ، وزیراعظم چندی سیکا نا باسک ملک آتا راہشون آتون ہڑتوم آ کنڈآتا اوڑدہی کیک ہرافتا مسخت دا ملک آتون واپار، زرکاری و توانائی نا بشخ آتیٹی کمکاری ءِ مون آ دننگ ءِ۔