اسلام آباد۔ 11 اکتوبر (اے پی پی) وزیراعظم محمد شہباز شریف ایشیاٹی رابطہ و پت سازی نا گام گیج (سیکا) نا بابت کانفرنس نا اِرا دے ئی شش می سروک دیوان اٹی بشخ ہلیک، وزیراعظم 13 اکتوبر آکانفرنس نا بنائی دیوان آن اہم ءُ تران اس کیک۔ سے شنبے نادے آ وزارت خارجہ آن جاری بیان نا رداٹ وزیراعظم محمد شہباز شریف قزاخستان نا دارالحکومت آستانہ ٹی ’’ایشیاٹی رابطہ و پت سازی نا گام گیج ‘‘(سیکا) نا بابت کانفرنس نا اِرادے ئی(12، 13 اکتوبر) آ مروک آ شش می سروک دیوان اٹی بشخ ہلیک۔ کابینہ باسک و بڑزکو کمامدار آک ہم اوڑتون اوار مریرہ۔ وزیراعظم 13 اکتوبر آ کانفرنس نا بنائی دیوان آن اہم ءُ تران اس کیک۔ او تینا تران اٹی ایشیائی ملک آتے مون تروک اسیجائی چیلنج آتون مون تننگ کن گپ وتران، سمجھوتہ و کمکاری نا مون آ دننگ کن سیکا نا یکتا فورم نا وڑاٹ اہمیت ءِ تالان کیک۔ وزیراعظم علاقائی و جہانی امور آ پاکستان نا نکتہ نظر ءِ ہم تالان کیک۔ سروک دیوان نا وخت آ وزیراعظم سیکا نا باسک ملک آتون ہڑتوم آ کنڈآتا اوڑدہی ہم کیک ہرافتا مسخت خاص وڑاٹ واپار، زرکاری و توانائی نا بشخ آتیٹی گیشتر کمکاری ءِ مون آدننگ ءِ۔ سیکا مچ آ ایشیانا 27 ملک آتیا تالان بین الحکومتی فورم ءِ ہراکہ 1992 ٹی جوڑ کننگا۔ داٹی برصغیر ایشیاٹی امن، سلامتی و راجی و زرگزرانی شونداری نا مون آ دننگ آ چکار کننگک۔ سیکا مذاکرات و کمکاری نا کمک اٹ علاقائی سوگوی و شونہالی نا ہدف آتا دوئی کننگ کن قابل قدر فورم اسے۔ دا فورم 5 بھلا بشخ آتیٹی پت سازی نا گام گیج آتے مون آ دیک ہراٹی زرگزرانی سمت، چاگڑدی سمت، انسانی سمت ، پوسکن آ چیلنج و خطرہ و فوجی و سیاسی سمت اوار ءِ۔ سیکا نا منشور و ہدف آتا رداٹ وزیراعظم نا سروک دیوان اٹی بشخ ہلنگ آن دا پیدوار مریک کہ پاکستان ایشیاٹی رابطہ و زرگزرانی کمکاری نا مون آ دننگ ءِ بھاز اہمیت ایتک۔
