اسلام آباد۔ 11 اکتوبر (اے پی پی) پاکستان بھارتی وزیراعظم نا کنڈآن ریاست گجرات اٹی السی ریلی ٹی بھارت نا غیر کانودی کوزہ گیری ٹی جموں وکشمیر نا بابت بیان ءِ یکسر مسترد کرینے۔ سے شنبے نادے آ دفترخارجہ آن جاری بیان نا رداٹ پاکستان بھارتی وزیراعظم نا مزاحیہ وڑاٹ داپاننگ کہ او وڑاسے ٹی کشمیر ناویل ءِ ایسر کرینے، نئے بیرہ دروغ بلکن ریفنگ اسے و داڑآن دا پاش مریک کہ بھارتی سرکڑدہ جموں وکشمیر اٹی ڈغاری راستکی تیان اخہ در غافل ءِ۔ بیان اٹی پاننگاکہ جموں و کشمیر جہانی کہول آ امنا مروک ءُ جھیڑہ اسے۔ دانا بابت 1948 آن داتم اسکان قرارداد آک اقوام متحدہ نا ایجنڈاٹی اوار ءُ۔ جھیڑہ نا حتمی ایسری کن آجو و انصاف اٹ رائے شماری اقوام متحدہ نا پیدوار قرارداد آتیان پد ہم بھارت نئے بیرہ داڑآ غیرکانودی کوزہ کرینے بلکن 9 لکھ کوزہ گیر بھارتی فورس آتا تعیناتی نا کمک اٹ بدترین انسانی حق انا خلاف ورزی تا ہم دوبہ دار ءِ۔ بیان اٹی مستی پاننگاکہ دا حقیقت ءِ کہ بھارت نا غیرکانودی کوزہ گیری ٹی جموں وکشمیر نا الس نرزوری اٹ بھارتی ظلم انا مقابلہ ءِ کننگ ءِ، بھارت آبادی نا کچ اٹ ناپاک بدلی و سلہہ بند چم آتا کمک اٹ تینا کوزہ ءِ برقرار تخنگ نا کوشست کننگ ءِ۔ بھارتی سرکڑدہ نا مقبوضہ علاقہ نا چالاکی اٹ کروک آ دورہ و حالیت آتے معمول نا رداٹ نشان تننگ کن پن انا شونداری ڈٹ آتا بناءِ کننگ آن نئے تو جمو ں وکشمیر اٹی غیرکانودی بھارتی کوزہ غان آجوئی کن جہد کروک آ کشمیری تا جوزہ ءِ پست کننگ مریک و نئے بھارت دنیا ءِ تینا فریب کاری تیان دھوکہ تننگ اٹ سرسہب مریک۔ اسہ کنڈی وڑاٹ جھیڑہ نا ایسری نا بابت پرفریب بیان تننگ نا جاگہ غا بھارتی سرکڑدہ کشمیری و دنیا تون کروک آ تینا قول آتے پورو کے۔ و کشمیری الس ءِ اوفتا ناقابل تنسیخ حق، حق خودارادیت تننگ ءِ پک کے۔ پاکستان پدریسہ جہانی برادری آن خواست کرینے کہ جموں وکشمیر اٹی بھارتی ظلم اناتوننگ نا بابت تینا کڑد و زمواری ءِ پورو کے۔ بھارت ءِ مقبوضہ علاقہ ٹی آبادی نا کچ ءِ بدل کننگ تون اوار اوار کودک کشمیری تیا اونا وحشیانہ جور کن ہم زموار گوندنگے۔ بیان اٹی داہم پاننگاکہ پاکستان انسانی حق انا تنظیم تیان جموں و کشمیر اٹی بھارتی ریاستی دہشت گردی نا مذمت ءِ کننگ و 5 اگست 2019 نا بھارتی حکومت نا اسہ کنڈی گام ءِ دمدستی پدی ہلنگ نا خواست انا درشانی ءِ کیک۔ جموں و کشمیر نا جھیڑہ نا اسٹ انگا ایسر داہیت ءِ پک کننگ اٹی ءِ کہ کشمیری تے جمہوری وڑتا کمک اٹ حق خودارادیت ءِ کاریم اٹ اتنگ نا موکل تننگے تانکہ او اقوام متحدہ نا قرارداد آتا رداٹ تینا آجو و بے کنڈ ہلوک استصواب رائے ءِ کاریم اٹ اتنگ کیر۔
