اسلام آباد۔ 11 اکتوبر (اے پی پی) چیئرمین سینیٹ محمد صادق سنجرانی پارینے کہ پاکستان سعودی عرب تون تینا تعلقداری تے بھاز اہمیت ایتک، پاکستان نا الس و حکومت مشکل وخت اٹی سعودی عرب نا کنڈآن پاکستان ءِ نوکاپ زہمی تیکن تروک آ کمک آ منت وار ءُ۔ داخیال آتا درشانیءِ او مسلم ورلڈ لیگ نا سیکرٹری جنرل شیخ ڈاکٹر محمد بن عبدالکریم عیسیٰ نا کماشی ٹی پارلیمنٹ ہاؤس اٹی اوڑدہی کروک آڈل اتون گپ وتران اٹی کرے۔ داوخت آ سینیٹر مولانا عبدالغفور حیدری ، حافظ عبدالکریم، دلاور خان ، نسیمہ احسان، اعجاز چوہدری و خالدہ اطیب ئسک ہم ساڑی ئسر۔ چیئرمین سینیٹ سیکرٹری جنرل مسلم ورلڈ لیگ و اونا ڈل انا دورہ پاکستان نا ستاءِ کرے۔ سینیٹ سیکرٹریٹ نا رداٹ چیئرمین سینیٹ محمد صادق سنجرانی پارے کہ صدارتی سول ایوارڈ تننگ آ نمے مبارکبادی ایتیوہ و صدارتی ایوارڈ مسلم امہ کن نما خذمت ، مسلم ورلڈ لیگ و بین المذاہب ہم آہنگی کن امن و رواداری نا کلہو ءِ تالان کننگ نا اعتراف ءِ۔ پاکستان سعودی عرب تون تینا ہڑتوم آ کنڈآتا تعلقداری تے قدر انا نظر اٹ ہرک۔ اوپارے کہ پاکستانی قوم اسلاموفوبیا نابرخلاف تحریک نا کماشی کن مسلم ورلڈ لیگ نا کنڈآ ہرک ، و نن دیکی ٹی اسلام نا بارواٹ غلط گمانی تے مر کننگ و اسلام نا پرامن و روادارانہ نظریہ ءِ غیر مسلم دنیا ٹی تالان کننگ کن مسلم ورلڈ لیگ نا کوشست آتا ستاءِ کینہ۔ چیئرمین سینیٹ پارے کہ خادم الحرمین شریفین شاہ سلمان بن عبدالعزیز نا مدبرانہ کماشی ٹی مملکت سعودی عرب نا شونداری بھاز سفت نا قابل ءِ و سعودی عرب نا وزیر اعظم شہزادہ محمد بن سلمان نا سعودی عرب نا الس نا گچینی کن وژن خاص وڑاٹ قدر انا قابل ءِ۔ اسلامی دنیا نا ویل آتا ایسری کن مملکت سعودی عرب، مسلم ورلڈ لیگ و خاص وڑاٹ سیکرٹری جنرل نا کڑد بھاز سفت نا قابل ءِ۔ اوپارے کہ خادم الحرمین شریفین و سعودی عرب نا سرکڑدہ نا ڈیہہ ٹی امن و شونداری کن کوشست آتا معترف ءِ و پاکستان و سعودی عرب نا نیام اٹ دیرینہ برادرانہ تعلقداری ءِ ہرا ننا اسیجائی مذہب، اسیجائی قدر و دودوربیدگ اٹی سوگوی تون گنڈوک ءِ۔ ہڑتوم آ ملک آک ہمیشہ ہروڑنا مشکل حالیت آتیٹی اسہ ایلو تون تفینو۔ چیئرمین سینیٹ محمد صادق سنجرانی پارے کہ پاکستان سعودی عرب تون تینا تعلقداری تے بھاز اہمیت ایتک و پاکستان نا الس و حکومت مشکل وخت اٹی سعودی عرب نا کنڈآن پاکستان ءِ نوکاپ زہمی تیکن تروک آ کمک آ منتوار ءُ ۔ ساڑی آ بھسکار نوکاپ مچ آ پاکستان اٹی لکھ آ بندغ آتے براہ راست زہمی کرینے و 1700 آن زیات بندغ زوال و زرگزران ءِ ارب آ روپئی نا نسخان رسینگانے۔ اوپارے کہ پاکستانی پردیسی تے آسراتی فراوان کننگ آ سعودی حکومت نا منت وار اُن۔ چیئرمین سینیٹ سیکرٹری جنرل نا پاکستان اٹی برجا دورہ کن نیک است خواہی نا درشانی ءِ کرے۔
