اسلام آباد۔ 10 اکتوبر (اے پی پی) ورلڈ ہیلتھ آرگنائزیشن (ڈبلیو ایچ او ) نا پاکستان اٹی کنٹری نمائندہ ڈاکٹر پالیتھا گنارا تھنا مہیپالا باوری کرفینے کہ پاکستان نا نوکاپ آن زہمی علاقہ غاتیٹی جان جوڑی نا آسراتی فراوان کننگ انگ ءِ، ڈبلیو ایچ او جان جوڑی نا آسراتی تا گچین نظام ءِ گچین جوڑ کننگ نا ڈٹ آتیا کاریم کننگ ءِ۔ ڈبلیو ایچ او نا کنٹری ہیڈ پارے کہ اونا ادارہ پاکستان اٹی ساڑی آ نوکاپ آن مروک آ بھسکاری تیان جوانی اٹ معلومدار ءِ ، نوکاپ ہموجاگہ نا مخلوق نا زند آتے بھاز نسخان تسنے ہراٹی اوفتا جان جوڑی ءِ چندی خطرہ مون تروک ءِ، زہمی علاقہ غاتیٹی ڈائریا، دست، ملیریا، ڈینگی اِل، جلد انا انفیکشن و ٹائیفائیڈ کون آناجوڑی تیٹی ودکی نا کچ خننگانے۔ قومی و صوبائی کمامدارآتا کماشی ٹی ڈبلیو ایچ او تینا شریدار آتون دمدستی وڑاٹ کاریم کرینے و المی جان جوڑی نا آسراتی تا فراوانی ءِ پک کننگ کن دمدستی گام گیج کرینے و گچین وڑوڈول انا کمک اٹ جان جوڑی نا نظام نا بحالی کن حکومت پاکستان نا کمک ءِ کننگ ءِ۔ اوتینا بیان اٹی مستی پارے کہ نوکاپ آن زہمی علاقہ غاتیٹی جان جوڑی نا آسراتی فراوان کروک آ کارندہ غاک زبردست کاریم کرینو۔ اونوکاپ زہمی تے جان جوڑی نا بنداوی آسراتی تا فراوانی آ بنجائی و صوبائی حکومت آتا کوشست آتا ہم ستاءِ کرے۔ اوپارے کہ نوکاپ نا بھسکاری تے مون آ تخسا ڈبلیو ایچ او نصیر آباد، سکھر و حیدر آباد اٹی مسہ آپریشنل ہب و پنجاب، سندھ، بلوچستان و کے پی کے ٹی نوکاپ آن زہمی علاقہ غاتیٹی 10 ایمرجنسی آپریشن سینٹر جوڑ کرینے، ڈبلیو ایچ او المی دوائی ، طبی گڑا، دیر ساف کروک آ کٹ، ٹینک، ٹینٹ و تمبو تا مد اٹی 618،048.08 ملین امریکی ڈالر نا امداد فراوان کرینے۔ اوپارے کہ صوبہ غاتیٹی نوکاپ نا ہلہلہ ئی حالیت آتیٹی امداد بشخنگانے۔
