اسلام آباد۔ 24اپریل (اے پی پی) چاہندارِ اقتصادیات ڈاکٹر منظور خان آفریدی پارینے کہ چین پاکستان اقتصادی راہداری نا ڈٹ آتیا کاریم ترندی اٹ برجائِ و غٹ ڈٹ آتے تخوک آ وخت اٹی پورو کننگک۔ ریڈیو پاکستان تون ہیت وگپ کرسا اوپارے کہ سی پیک نا رداٹ جاری چنکا ڈٹ آک 2018، نیامی ڈٹ آک 2024ءو مریس وختی ڈٹ آتے 2030 ءاسکان پورو کننگک۔ اوپارے کہ حکومت خوائک کہ چین پاکستان اقتصادی راہداری ڈٹ انا رداٹ جاری غٹ ڈٹ آتے بروخت پورو کرسا چین اتون کروک آ وعدہ ئِ پورو کننگے انتئے کہ دا ڈٹ پاکستان تون اوار ڈیہہ نا شونہالی نا مزل نا نشان ئِ۔ قراقرم ہائی وے و تھاکوٹ آن حویلیاں اسکان 118 کلومیٹر روڈ انا جوڑ جاڑ نا بابت آن چست کروک آ سوج انا ورندی ئِ ترسا اوپارے کہ قراقرم ہائی وے سی پیک اٹی بے کچ اہمیت تخک و دا روڈ ایبٹ آباد آن حسن ابدال نا علاقہ غاتیٹی بھاز تنک ئِ و راہداری کن دا روڈ انا دمدستی جوڑ جاڑ ئِ کننگ المی ئِ۔ حکومت داڈٹ انا جوڑ جاڑ کن 7سد ملین روپئی فنڈ جاری کرینے۔
