اسلام آباد۔ 24اپریل (اے پی پی) مسلم لیگ (ن) ناراہشون محمد ثقلین بخاری پارینے کہ وزیراعظم محمدنواز شریف نا ویژن و قوم اتون کروک آ وعدہ غاتا رداٹ 2018ءنا گچین کاری تیان مست توانائی تنکی نا مون ئِ توننگک۔ ریڈیو پاکستان تون ہیت وگپ کرسا اوپارے کہ وزیراعظم پاکستان 2013ءنا گچین کاری مہم اٹی قوم اتون وعدہ کریسس کہ او توانائی تنکی ئِ پوروی اٹ چٹفک و اقتدار اٹی بننگ آن پد غٹ آن زیات کاریم ہم توانائی تنکی نامون ئِ توننگ آ کننگا و تہو، کولا، شمسی، تھرمل پروجیکٹ آتا بناءکننگا ہرافتیا کاریم ترندی اٹ برجائِ۔ اوپارے کہ ملک وزیراعظم محمد نواز شریف نا سروکی ٹی ترندی اٹ شون ہلنگ ئِ و چین نا کمک اٹ بھکھی ، ساہیوال، بہاولپور، پورٹ قاسم و تربیلا پاور پروجیکٹ آتیا جوڑ جاڑی کاریم ترندی اٹ جاری ئِ۔ بھکھی آن 717 ، ساہیوال آن 660، پورٹ قاسم آن 660و تربیلا آن 210 میگاواٹ بجلی قومی گریڈ اٹی اوار کننگک و 2018 ءنا گچین کاری تیان مست پاکستان ئِ لوڈشیڈنگ آن پورو چھٹکارہ ملک۔
