منہ سال اٹی پاکستان نا شمار دنیا ٹی غٹ آن زیات ریشم ودی کروک آ ملک آتیٹی مریک
لاہور۔ 16اپریل (اے پی پی) محکمہ جنگلات پنجاب نا شعبہ سیری کلچر نا اِرا دہائی آن جاری خواری آخر کار رنگ اس ایس، درآمدی سیڈ آن پاکستان اٹی خام ریشم نا پیداوار 8 ہزار کلو گرام آن گدرینگانے۔ اسسٹنٹ ڈائریکٹر سیری کلچر محمد فاروق بھٹی اے پی پی ئِ پارے کہ گدرینگوک آ سال بیرہ پنجاب اٹی درملکی سیڈ آن 4 میٹرک ٹن پیداوار مس وخت اس کہ اینخو سال 8میٹرک ٹن پیداوار مس و ہندا اوسط آن نن منہ سال اٹی دنیا ٹی غٹ آن زیات ریشم ودی کروک آ ملک آتا صف اٹی اوار مرینہ، اوپارے کہ طلب پورو مفننگ نا سوب داوخت دنیا ٹی 46.5 درسد مصنوعی ریشم کاریم اٹ اتنگ انگ ئِ ہرانا انسانی جان جوڑی آ بے کچ منفی زئم تمنگ ئِ۔ اوپارے کہ نجی بشخ انا اشتراک آن درملکی سیڈ آن ریشم نا اُرائی صنعت ئِ دُواری تینا نت تیا سلفینے ہراڑآن ملک اٹی ریشم نا پیداوار نا ہدف دوئی مننگ نا گمانک روشن مسنو۔ اسہ سوج اسے نا ورندی ٹی اوپارے کہ جنگل آتیٹی نہادی پاٹ تا دُزی ئِ توننگ نا برخلاف مہم اٹی شہتوت نا درخت آتے بے رحمی اٹ کاٹ کننگا وخت اس کہ جنگل آتا چکار ایلو نہادی پاٹ تے بچفنگ آ لگوک مس ہراٹی 90 نا دہائی آن پد پنجاب اٹی ریشم سازی نا صنعت زبوں حالی نا گواچی مس ۔، اوپارے کہ منہ سال مست محکمہ جنگلات شعبہ سیری کلچر ریشم نا اُرائی صنعت ئِ دُوارہ تینا نت تیا سلفنگ کن غیر معمولی گام گیج کرے، پنجاب نا چندی علاقہ چھانگا مانگا، چیچہ وطنی، منڈی بہاﺅالدین، سرگودھا، فیصل آباد، میاں چنوں ، بہاولپور و گجرات وغیرہ ٹی سد آ ایکڑ ڈغار تیا شہتوت نا درخت خلنگا و درملکی سلک سیڈ خوائفنگا ہرا سرسہب آزموندہ ثابت مس۔ اوپارے کہ اُرائی کہول آ خام ریشم نا صنعت ئِ مون آ دننگ نا سوب بیرہ اسہ تواٹی دونیم سد خاہوت ئِ 40 آن 45 لکھ کٹیا مس وخت اس کہ خام ریشم نا پیداوار اٹی گچینی بس۔ ہندی ٹھیکیدار آتا پاننگ ئِ کہ اگہ ریشم سازی نا صنعت آ چکار تخے تو نئے بیرہ زرمبادلہ ئِ بچفنگ مریک بلکن لکھ آ خاہوت ئِ روزگار ہم فراوان کننگ مریک۔
