اسلام آباد۔ 01 فروری (اے پی پی) سینیٹ اٹی قائد ایوان ڈاکٹر شہزاد وسیم پارینے کہ سٹیٹ بینک (ترمیمی) بل منظور مس ولے اونا سیاسی بازگشت اینو ہم بِننگ انگ ءِ، اسٹیٹ بینک آرڈیننس اٹ ترمیم تدوک آ حکومت آتے ٹی ہم مرسا کرینے، ہمووخت آ داروائسک تو ایون دا امر ناروا مس۔ سے شنبے نادے آ بڑزکو ایوان نا دیوان اٹی سینیٹر تاج نا اعتراضی ٹک انا ورندی ٹی اوپارے کہ بل انا منظوری بیرہ وخت انا مد انا سوب آن ئسک، ورنہ مچ آ ریاست تو بل آ امنائسک۔ اوپارے کہ اسٹیٹ بینک آرڈیننس اٹ مہالو ہم ترمیم مرسا کرینے۔ 1994ء، 1997ء، 2013ء و 2015 ء ٹی ہم ترمیم کننگا، 2012ء ٹی پیپلزپارٹی نا حکومت آئی ایم ایف تون رجوع کرے و 2013ء ٹی ترمیم کننگا۔ اوپارے کہ اسہ حکومت یا ادارہ اس ہم ریاست نا برخلاف فیصلہ کننگ کپک۔ اوپارے کہ اپوزیشن نا پورو چکار ڈیل یا ڈھیل نا کنڈآ مسنے، دا حکومت ءِ وڑانا وڑاسے ٹی بٹنگ خوارہ ولے اوفتے تون نئے گیگ بدل پروگرام اسے و نئے آخبت مریک۔ اوپارے کہ بل انا منظوری نا باندات آ اپوزیشن راہشونک تینٹ اسہ ایلو نا برخلاف بیان ترسا کرینو، استیفہ غاتا سیاست داسہ چٹانے، ہراسٹ ءِ استیفہ تروئی مریک اوایتک کاہک، الس ءِ ریفنگ مفک۔ اوپارے کہ ایم کیو ایم نا سینیٹر و بنجائی وزیر فروغ نسیم بل انا منظوری نا وخت آ ایوان اٹی ساڑی ئسک ولے کراچی ٹی ہرا تشدد ءِ سیاسی کارندہ غاتیا کننگا اونا سوب آن ایم کیو ایم نا اِرا باسک کراچی آن بننگ کتویسر، ننا سیوتیک ننتون تفوک ءُ۔
