اسلام آباد۔ 28 جنوری (اے پی پی) سینیٹ اسٹیٹ بینک آف پاکستان (ترمیمی) بل 2022ء نا منظوری ءِ تس۔ جمعہ نادے آ بڑزکو ایوان نا دیوان اٹی بنجائی وزیر خزانہ شوکت ترین تحریک پیش کرے کہ اسٹیٹ بینک آف پاکستان ایکٹ 1956ء ٹی پین ترمیم نا بل اسٹیٹ بینک آف پاکستان(ترمیمی) بل 2022ء قومی اسمبلی نا منظور کروک حالیت اٹ زیر غور اتنگے۔ چیئرمین تحریک آ رائے شماری کرفے تو تحریک نا حق و مخالفت اٹی 43،43 وونٹ بس اوکان پد چیئرمین سینیٹ تینا وونٹ ءِ تحریک نا حق اٹی تس ہراڑآن تحریک ءِ منظور کننگا۔ داوخت آ سینیٹر مشتاق احمد بل اٹی تینا ترمیم پیش کرے ہرادے ایوان مسترد کرے۔ اوکان پد چیئرمین بل ءِ شق وار منظوری کن ایوان اٹ پیش کرے۔ اپوزیشن بل آ رائے شماری نا خواست کرے ہراڑآ حساب کرفنگا تو بل انا حق ٹی 43 و بل انا مخلافت اٹی 42 باسک آک وونٹ تسر ہراڑآ بل گیشتری سلاہ اٹ منظور کننگا۔ داکان مست ایوان بالا نا دیوان اٹی کانودسازی ٹی وزیر مملکت پارلیمانی امور علی محمد خان ایوان ءِ پارے کہ وزیرخزانہ زرس ہرے اسکان ایوان آ بننگ ءِ و اوتینٹ دابل ءِ پیش کیک۔ اپوزیشن باسک آک داڑآ شورشرابہ کریر وخواست کریر کہ ددمدستی وڑاٹ بل رائے شماری کن پیش کننگے۔ اپوزیشن باسک آک پاریر کہ حکومتی باسک آتا کچ کم ءِ، ہنداخاطرآن رزاک اٹ بل ءِ پیش کننگ اٹ ہرے کننگ انگ ءِ۔ اپوزیشن نا شورشرابہ نا سوب آن چیئرمین دیوان ءِ نیم گھنٹہ اسکان پدبٹے۔ دیوان ہراتم دُوارہ بناکرے تو اپوزیشن باسک آک مصطفیٰ نواز کھوکھر، شیری رحمان، مولانا عبدالغفور حیدری و سینیٹر رضاربانی ئسک بل ءِ دمدستی پیش کننگ نا خواست کریر وپاریر کہ زراک اٹ بل ءِ پیش کننگ اٹ ہرے کننگ انگ ءِ۔ سینیٹر فاروق ایچ نائیک پارے کہ دابل داسہ اسہ تُو اکن ایوان نا یجنڈاغا بایدے بف، سینیٹ سیکرٹریٹ داہیت ءِ پک کے۔ چیئرمین سینیٹ پارے کہ او تینا وڑاٹ بل ءِ ایوان اٹ پیش کننگ یا اودے ملتوی کننگ نا فیصلہ ءِ کننگ کپک، حکومت ایجنڈا ایتک، اگہ بل ایجنڈا گا ساڑی ءِ تو اودے موخر یا ملتوی کننگ نا فیصلہ حکومت ہی کننگ کیک۔ داوخت آ قائد ایوان سینیٹر ڈاکٹر شہزاد وسیم پارے کہ اپوزیشن باسک آک ہراوڑ و ہرارول آتا رداٹ داپاننگ ءُ کہ دیوان ءِ پدبٹنگے۔ اوفک ایوان نا روایت آتا بایدے شرف ءِ کیر۔ ہنداوخت آ وزیر خزانہ شوکت ترین ایوان اٹ بس تو چیئرمین پارے کہ وزیر خزانہ سرمسنے، داسہ او دا بل ءِ تینٹ پیش کیک اوکان پد اسٹیٹ بینک آف پاکستان (ترمیمی) بل 2021ء نا منظوری نا عمل نا بناءِ کننگا۔

متعلقہ مضامینمصنف کی طرف سے مزید