اسلام آباد۔ 21 جنوری (اے پی پی) وزیراعظم عمران خان تدوک آ 3 سال اٹی جی ڈی پی ٹی 5.37 درسد نمونا دوئی کننگ آ تینا حکومت ءِ مبارکبادی ترسا پارینے کہ ساڑی حکومت نا اقتصادی اصلاحات نا سرسہبی نا جہانی کہول آ اعتراف ءِ کننگ انگ ءِ، کوویڈ۔ 19 نا جہانی دین آن پد ہڑدے ئی زند زوت بحال مروک آ سرفہرست 3 ملک آتیٹی پاکستان اوار ءِ۔ جمعہ نادے آ تینا ٹویٹ آتیٹی وزیراعظم پارے کہ او 3 سال آتیٹی جم قومی پیدوار (جی ڈی پی) ٹی 5.37 درسد نا نمو آ تینا حکومت ءِ مبارکبادی تننگ خواہک ہرانا نتیجہ ٹی ملازمت آتا قابل ذکر وارخواہی ودی مس و فی کس کٹیا ٹی ودکی مس۔ وزیراعظم پارے کہ ننا حکومت نا اقتصادی اصلاحات نا سرسہبی نا جہانی وڑاٹ تائید و توثیق مننگ ءِ، بلوم برگ پاکستان اٹی نمو نا پائیدار تسلسل و روزگار نا بڑزکو کچ انا پیش گوئی کرینے۔ وزیراعظم پارے کہ پاکستان ہمو 3 سرفہرست ملک آتیٹی اوار مسنے ہراکوویڈ۔ 19 نا جہانی دین آن پد ہڑدے ئی زند ترندی اٹ بحال مسنے ہراڑآن پاش مننگ ءِ کہ پاکستان اٹی انسانی زند و روزگار ءِ رکھ فراوان کننگا۔ وزیراعظم پارے کہ دی اکانومسٹ داہیت انا اعتراف ءِ تینا تازہ انگا نارمیلسی انڈیکس اٹی کرینے۔ وزیراعظم ٹویٹ آتون اوار دی اکانومسٹ نا حساب وکتاب نا لنک اس ہم شیئرکرینے ہرانا رداٹ کوویڈ۔ 19 نا دین نا شدت اٹی کمتی آن پد ہڑدے ئی زند زوت بحال مروک آ 50 ملک آتیٹی پاکستان نا ارٹ میکو نمبر ءِ، دا فہرست اٹی امریکہ 25 می، آسٹریلیا 38، فرانس 17، برطانیہ 39، نیوزی لینڈ41 ، جرمنی 42، ہالینڈ 50 ، چین 33، ویتنام 30 و برازیل 16 می نمبرآٹی ءِ، کوویڈآن پد ہڑدے ئی زند ءِ زوت بحال کرفوک آ ملک آتیٹی بھارت ہشت میکو نمبر آٹے۔
