اسلام آباد۔ 21 جنوری (اے پی پی) وزیراعظم نا خصوصی کمکار راجی رکھ و تخفیف نیزگاری سینیٹر ثانیہ نشتر پارینے کہ حکومت چناتیٹی غذائی کمتی نا مون ءِ توننگ کن پدسلوک آ ضلع غاتیٹی 50 سینٹرز جوڑ کرینے، جون 2022ء ٹی ہرضلع ٹی دا سینٹر آتے جوڑ کننگک۔ جمعہ نادے آ بڑزکو ایوان نا دیوان اٹی وقفہ سوج آتیٹی سینیٹر سیمی ایزدی نا سوج انا ورندی ٹی اوپارے کہ غذائیت اٹی کمتی نا سوب چناتا قد چنک سلک، نیزگاری، ناخواندگی، کم وئی نا برام، چناتیٹی ناجوڑی ہم اونا سوب مریک، دابارواٹ آگاہی نا کمتی ہم اسہ بھلو ویل اسے۔ اوپارے کہ ساڑی حکومت احساس نشوونما پروگرام نا بناءِ کرینے ہرانا رداٹ پدسلوک ضلع غاتیٹی 50 ڈسٹرکٹ ہسپتال آتیٹی سینٹر ملنگانے وخت اس کہ جون 2022ء ٹی ہر ضلع ٹی دا ہند آتے جوڑ کننگک۔ وزیر مملکت پارلیمانی امور علی محمد خان پارے کہ پنچ سال آن کم وئی نا چناتیٹی 53.7 درسد اینیماو 40.2 خور انا کمتی نا گواچی ءُ، وزیراعظم نا پارت آ نیشنل ٹاسک فورس اس ٹہیفنگانے ہرانا ہدف 67 ضلع غاتا زالبول و چناتا خیالداری نا بابت گام گیج کننگ ءِ۔
