اسلام آباد ۔ 21 جنوری (اے پی پی) وزیرخارجہ مخدوم شاہ محمود قریشی پارینے کہ پاکستان اٹی سیل و سوات نا مون آ دننگ پاکستان تحریک انصاف نا حکومت نا اولیت آتیٹی اوار ءِ۔ داہیت ءِ او وزیراعظم عمران خان نا خصوصی کمکار سیل و سواتی رابطہ اعظم جمیل تون گپ وتران کرسا پارے، ہرا جمعہ نادے آ وزارت خارجہ ٹی اوڑتون اوڑدہی کرے۔ اوڑدہی ٹی سیل و سوات نا مون آ دننگ کن چندی پلو آتیا گپ و تران کننگا۔ وزیر خارجہ پارے کہ پاکستان اٹی سیل و سوات نا مون آ دننگ وزیراعظم عمران خان و پاکستان تحریک انصاف نا حکومت نا اولیت آتیٹی اوار ءِ، 2019اٹی پاکستان اٹی سیل و سوات نا بشخ اٹی بے مٹ شونداری مس۔ اوپارے کہ کورونا دین انا سوب آن، ہراڑے ایلو بشخ آک زہمی مسر ہموڑے سیل و سوات نا بشخ ءِ ہم بھاز نسخان رسینگا۔ کورونا دین انا حالیت آتیٹی گچینی آن پد مچ آ دنیا نا سیل و سواتیک دُوارہ سیل و سوات نا کندآن متوجہ مننگ ءُ۔ شاہ محمود قریشی پارے کہ نن سیل و سوات نا مون آدننگ کن پاکستان آ بننگ نا خواہندار، سیل وسواتی تیکن آن ویزہ تون اوار چندی آسراتی فراوان کننگ اُن۔ کنا دورہ سپین اٹی اقوام متحدہ نا جہانی تنظیم سیل و سوات (یواین ڈبلیو ٹی او) نا سیکرٹری جنرل اتون بھاز فائدہ ئی اوڑدہی مس۔ وزیراعظم نا خصوصی کمکار سیل وسواتی رابطہ، اعظم جمیل وزیرخارجہ نا منت واری ءِ ہرفسا وزارت خارجہ نا کمک اتون اسہ جامع قومی سیل و سواتی پالیسی اس زوت مرتب کننگ نا عندیہ تس۔
