اسلام آباد۔ 21 جنوری (اے پی پی) بنجائی وزیر تعلیم ، کسبی تربیت، قومی میرات و دودوربیدگ شفقت محمود نا پارت آتیا بنجائی وزارت تعلیم مچ آ ملک انا طالب علم، استاد و لمہ و باوہ غاتا اومیکرون دین انا برخلاف المی آگاہی کن ایس ایم ایس سروس مہم نا بناءِ کرینے۔ جمعہ نادے آ وزارت تعلیم نا کنڈآن جاری بیان نارداٹ بنجائی وزارت تعلیم، ایس ایم ایس آگاہی مہم نا اولیکو ریسہ ٹی ٹیلی کام کمپنی جاز انا کمک اٹ 12 ملین سبسکرائبرزاسکان تینا آگاہی کلہو نا فراوانی ءِ پک کیک۔ ایس ایم ایس آگاہی مہم نا بنااسلام آباد آن کننگ انگ ءِ وخت اس کہ ایلو ریسہ ٹی، دامہم نا دنگ ءِ ایلو ٹیلی کام کمپنی تا کمک اٹ ودفسا مچ آ ملک اٹی تالان کننگک۔ بنجائی وزارت تعلیم و کسبی تربیت تینا آگاہی کلہو اٹی طالب علم، استاد و لمہ و باوہ غاتیان ترندی اٹ تالان مروک اومیکرون دین انا برخلاف رکھی گام گیج ہرافتے ٹی وقفہ وقفہ اٹ دوتے سلنگ، ماسک انا کاریم اٹ اتنگ، راجی فاصلہ ءِ برقرار تخنگ، مچی آن بچنگ اوار ءِ، آ پورو وڑاٹ عملدرآمد کننگ نا تنبیہ کرینے وخت اس کہ 12 سال و اوکان زیات وئی نا چناتا ویکسی نیشن ءِ المی کرفنگ نا ترغیب تسنے۔ بنجائی وزارت تعلیم و کسبی تربیت نادا ایس ایم ایس مہم نا مسخت طالب علم ، استاد و لمہ و باوہ غاتا آگاہی تون اوار اوار ، تعلیمی سرجزآتے دا مشکل وخت اٹ برجاتخنگ ءِ۔
