اسلام آباد۔20جنوری (اے پی پی): مزن وزیر عمران خان ءَ آبپاشی ءِ ھوالگ ءَ توامیں جاڑیگیں منصوبگ آناں گیشینتگیں وھد ءُ پاس ءَ سرجم کنگ ءَ پنت ءُ شون کنان ءَ گوشت کہ آپی بنزہ آنی وھد ءُ موہ ءِ سر ءَ جوڑیشت ءُ کشت ءُ کشار ی زمین آناں آپ دیگ ءَ چہ لائک ءِ کشت ءُ کشار جوڑ کنگ ملکی وردن ءُ وراک ءِ رکھینگ سک باز ارزشتی انت۔ اے ھیالانی درشانی آئی ءَ پنچ شمبے ءِ روچ ءَ ملک ءَ آپ ءِ پجاری ءِ نظام ءَ را گہتری ءِ واستہ گامگیج آنی سر ءَ چار ءُ تپاسی دیوان ءِ سروکی ءَ کنان ءَ کت۔ دیوان ءَ را صوبگ آنی تہ ءَ آپ ءِ جوانیں بھر ءُ بانگ ءِ واستہ مھکمیں ءُ دراج پریں نظام، کہن آنی آپ ءَرا ابید نکسان ءَ ڈگار آں پجاری ءِ واستہ گامگیج، آپ ءِ دزئی ءِ گر ءُ دار ءِ واستہ جوانیں نظام ءُ آپ ءِ پجاری ءِ نظام ءَ دراج بر کنان ءَ گیر آباتیں زمین آنان لائک ءِ کشت ءُ کشار جوڑ کنگ ءِ واستہ منصوبگ آنی سر ءَ بریفنگ دیگ بوت۔ مزن وزیر ءَ توامیں جاڑیگیں منصوبگ آناں وھد ءُ موہ ءِ سر ءَ سرجم کنگ ءِ پنت ءُ شون جاڑی کنان ءَ آپ ءِ بنزہ آنی منصوبگ آنی وھد ءُ موہ ءِسر ءَ سرجمی ءُ کشت ءُ کشاری زمین آناں آپ ءِ پجاری ءَ چہ لائک ءِ کشت ءُ کشار جوڑ کنگ ءَ ملکی وردن ءُ وراک ءِ رکھینگ ءِ واستہ سک باز ارزشتی نامینت۔ دیوان ءَ مزن وزیر ءِ مشیر راجی سلامتی ڈاکٹر معید یوسف، نائب چیئرمین منصوبگ بندی کمیشن ءُ سیادی داروکیں اپسرگ آں بھر زوری کت وھدیکہ سر وزیر خیبر پختونخوا محمود خان ءُ ٹوھیں صوبائی اپسرگ آں وڈیو لنک ءِ وسیلگ ءَ دیوان ءَ بھر زوری کت۔
